ලුණු හිඟය නිසා කොළඹ කොටස් වෙළෙඳපොළේ ලුණු සමාගම් වල කොටස් මිල ඉහළට!

ඊයේ දිනයේ දී කොළඹ කොටස් වෙළෙඳපොළ මිල දර්ශකවල කැපීපෙනෙන වර්ධනයක් වාර්තා වි ඇති බව සදහන් වේ.

එහිදී දිනයේ ගනුදෙනු අවසානයේ දී සියලු කොටස් මිල දර්ශක අගය ඒකක 215.07කින් ඉහළ ගොස් ඒකක 16131.24 ක් ලෙසත් S&P SL20 දර්ශක අගය ඒකක 76.23කින් ඉහළ ගොස් ඒකක 4,734.03 ක් ලෙසත් සටහන් වී ඇත.

මෙය පූර්ව ගනුදෙනු දිනයට සාපේක්ෂව පිළිවෙලින් 1.35%ක හා 1.64% ක වර්ධනයක් වේ.

රු. බිලියන 3.36ක සාපේක්ෂව ඉහළ ගනුදෙනු පිරිවැටුමක් ඊයේ දිනයේ දී වාර්තා වීම විශේෂත්වයකි.

ඒ සඳහා ජෝන් කීල්ස් හෝල්ඩිංග්ස් පීඑල්සී හි රු. මිලියන 433.98 ක ගිවිසා ගනු ලැබූ ගනුදෙනු කිහිපයකින් ඉහළ දායකත්වයක් ලැබී ඇති අතර ජෝන් කීල්ස් හෝල්ඩිංග්ස් සාමාන්‍ය ගනුදෙනු හරහා පිරිවැටුමට දෙන ලද දායකත්වය රු. මිලියන 148 කි.

මීට අමතර එයිට්කන් ස්පෙන්ස් (රු.මි. 171), සෙන්ට්‍රල් ෆිනෑන්ස් (රු. මිලියන 148), ඩයලොග් ආසියාටා (රු. මිලියන 117)ක් ලෙසින් දෛනික පිරිවැටුමට ඉහළ දායකත්වයක් ලබා දීමට සමත්ව ඇත.

අද දින නිරීක්ෂණය වූ විශේෂ කරුණක් වන්නේ ලුණු කර්මාන්තයට අදාළව කොළඹ කොටස් වෙළෙඳපොළේ ලැයිස්තුගත එකම සමාගම වන රයිගම් වයඹ සෝල්ටර්න්ස් පීඑල්සී හි කොටස් මිල දිනය තුළ 15% ක් ඉක්මවූ අගයයකින් ඉහළ ගොස් තිබීමයි. පූර්ව ගනුදෙනු දිනය අවසානයේ දී රු. 9.50 ක් ලෙසින් සටහන්ව තිබූ රයිගම් වයඹ සෝල්ටර්න්ස් පීඑල්සී කොටසක මිල ඊයේ දින රු. 9.80 සිට රු. 11.30 ක් දක්වා වූ මිල පරාසයන්වල ගනුදෙනු වී තිබුණි. එහි අවසන් ගනුදෙනු මිල සටහන් වූයේ රු. 11.00 ක් ලෙසිනි.

වෙළෙඳපොළ විශ්ලේෂකයින් පවසන්නේ මේ වන විට දේශීය වෙළෙඳපොළ තුළ ලුණු හිඟයක් නිර්මාණය වී තිබීමත්, ඒ හරහා දේශීය ලුණු මිල සීඝ්‍රයෙන් මේ වන විට ඉහළ ගොස් තීබීමත් යන කරුණු හේතුවෙන් ආයෝජක උනන්දුව මෙම සමාගමට යොමුව ඇති බවයි. රයිගම් වයඹ සෝල්ටර්න්ස් පීඑල්සී හි රුත මිලියන 48.85 ක වටිනාකමකින් යුතු කොටස් ගනුදෙනු අද දින වාර්තා වී ඇත.