පොලිස් හදිසි ඇමතුම් අංකය වන 119 අවභාවිත නොකරන ලෙස පොලිස් මාධ්‍ය කොට්ඨාසය ජනතාවගෙන් ඉල්ලා සිටියි.
පොලිස් මාධ්‍ය කොට්ඨාසය පවසන්නේ කාර්යක්ෂම හා ඵලදායි සේවාවක් ලබා ගැනීම සඳහා මෙම 119 අංකය නිසි අවබෝධයකින් යුතුව භාවිත කරන ලෙසයි.
පාරිභෝගික සේවා සම්බන්ධ පැමිණිලි, අල්ලස් සම්බන්ධ පැමිණිලි, රාජ්‍ය ආයතන මගින් සිදුවන අක්‍රමිකතා සම්බන්ධ පැමිණිලි, ඉඩම් ආරවුල්, මුදල් ආරවුල් වැනි පොලිසියේ සහය ක්ෂණිකව අවශ්‍ය නොවන අවස්ථාවන්වලදී එම හදිසි ඇමතුම් අංකය භාවිත නොකරන ලෙස එම නිවේදනය සඳහන් වේ.
යම් ලෙසකින් එලෙස අත්‍යවශ්‍ය නොවන අවස්ථාවකදී එය භාවිත කිරීමක් සිදුවුවහොත් අත්‍යවශ්‍ය වන හදිසි පැමිණිල්ලක් ඉදිරිපත් කරන්නෙකුට ඇමතුමේ වැඩි කාලයක් රැඳී සිටීමට සිදු වන බවද ඔවුන් සදහන් කරයි.
එවැනි තත්ත්ව මග හරවා ගැනීම සඳහා මහජනතාවට මුහුණ දීමට සිදුවන යම් ආපදාවක් හෝ පොලිස් නිලධාරීන්ගේ සහය ක්ෂණිකව ලබා ගැනීමට අවශ්‍ය‍ය අවස්ථාවකදී පමණක් එම ඇමතුම් 119 ට ලබාදෙන ලෙස පොලිස් මාධ්‍ය කොට්ඨාසය වැඩිදුරටත් සඳහන් කරයි.
