බොරැල්ල, සහස්පුර සිරිසර උයන ක්රීඩාංගණයේ රැඳී සිටිය දී වෙඩිවැදීමකින් තුවාල ලබා කොළඹ ජාතික රෝහලට ඇතුළත් කළ තරුණයින්ගෙන් තිදෙනෙකුගේ තත්ත්වය බරපතළ බව වාර්තා වේ.
කොළඹ ජාතික රෝහලේ, නියෝජ්ය අධ්යක්ෂ, වෛද්ය රුක්ෂාන් බෙල්ලන සඳහන් කළේ මෙයින් එක් තරුණයෙකුට ගැඹුරු තුවාල සිදුව ඇති බැවින් මේ වනවිට ඔහුව සැත්කමකට භාජනය කර ඇති බවයි.
කෙසේවෙතත් බරපතළ තුවාල ලැබු තිදෙනාම මේ වනවිට කොළඹ ජාතික රෝහලේ දැඩි සත්කාර ඒකකයේ ප්රතිකාර ලබන බවත් වෛද්ය රුක්ෂාන් බෙල්ලන පවසයි.
මීට අමතරව තවත් එක් අයෙකුගේ තත්ත්වය බරපතළ නොවන බවද වෛද්ය රුක්ෂාන් බෙල්ලන කියා සිටියේය.
දැඩි සත්කාර ඒකකයේ ප්රතිකාර ලබමින් සිටින තරුණයින් තිදෙනාට ඉදිරියේ දී තවත් සැත්කම්වලට භාජනය කළ යුතුව ඇතැයි ද සඳහන් කළ වෛද්ය රුක්ෂාන් බෙල්ලන, ඔවුන්ගේ සෞඛ්ය තත්ත්වය පිළිබඳ නිශ්චිතව මේ වනවිට පැවසිය නොහැකි බව ද සඳහන් කරයි.
බොරැල්ල, සහස්පුර සිරිසර උයන ක්රීඩාංගණයේ ඊයේ (07) රාත්රියේ සිදුවූ වෙඩිතැබීමෙන් එක් තරුණයෙක් අද උදෑසන ජීවිතක්ෂයට පත්විය.
ඊයේ රාත්රී 8.40ට පමණ ස්කූටර් වර්ගයේ යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් තරුණයින් පස්දෙනෙකු ඉලක්ක කර මෙම වෙඩිතැබීම සිදුකර තිබුණි.
එහිදී T 56 ගිනිඅවියකින් වෙඩි තැබීම සිදුකර ඇති අතර, වෙඩික්කරුවන් පලා ගොස් ඇතැයි පොලීසිය පවසයි.
වෙඩිතැබීමෙන් මියගොස් ඇත්තේ වයස අවුරුදු 23ක් වූ කැලණිය ප්රදේශයේ පදිංචිකරුවෙකු වන අතර, අවුරුදු 21, 22 සහ 23 යන වයස්වල පසුවන කොළඹ 9 ප්රදේශයේ පදිංචිකරුවන් සිව්දෙනෙකු මේ වනවිටත් කොළඹ ජාතික රෝහලේ ප්රතිකාර ලබමින් සිටියි.
