යුද්ධ හමුදා සාමාජිකයන්ගේ යහපැවැත්ම සහතික කරමින් පවත්වනු ලබන බහුවිධ වෛද්‍ය සායනයන්හි 7වන අදියර අම්පාර සහ මඩකලපුව දිස්ත්‍රික්කයන් හි පදිංචි විවිධ හේතුන්මත රණක්‍ෂිතයටපත් රණවිරුවන් හා විශ්‍රාමික මෙන්ම ක්‍රියාන්විත හේතූන් මත මියගිය රණවිරුවන්ගේ ළගම ඥාතීන් ඇතුලුව 1250කට අධික පිරිසකගේ සහභාගීත්වයෙන් අම්පාර කොන්ඩුවටුවාන ශ්‍රී ලංකා යුද්ධ හමුදා සටන් පුහුණු පාසලේ දී අද දින (2025.09.19) පවත්වන ලදි.
යුද්ධ හමුදාධිපති ලුතිනන් ජෙනරල් ලසන්ත රොද්‍රිගෝ මෙම අවස්ථාවට ආරාධිත අමුත්තා ලෙස සහභාගී විය.
රණවිරු සේවා හා පුනරුත්ථාපන අධ්යක්ෂ මණ්ඩලයේ අධික්‍ෂණය යටතේ සංවිධානය කළ මෙම වෛද්‍ය කඳවුර හරහා වෛද්‍ය ගැටළු හදුනාගනිමින් හා ඒ සඳහා විසඳුම් ලබාදීම, වෘත්තීය සෞඛ්‍ය උපදේශනය, මානසික සෞඛ්‍ය උපදේශන සේවාව, දන්ත වෛද්‍ය සේවාව, ජංගම වෛද්‍ය රසායානාගාර සේවය, කෘතිම අත් පා සහ ශල්‍ය උපකරණ ලබාදීම සඳහා පරීක්‍ෂණ මෙන්ම ජංගම අක්ෂි සායන, භෞත චිකිත්සක සායන, ඇතුලු තවත් සේවා ලබාදීමට කටයුතු සිදුකර ඇත.
මෙහිදී රණක්ෂිතයට පත් රණවිරුවන් සඳහා පමණක් නොව විශ්‍රාමික යුද්ධ හමුදා සාමාජිකයින් සහ ඔවුන්ගේ ළගම ඥාතීන්ට මෙන්ම යුද්ධයේදී මියගිය රණවිරුවන්ගේ පවුල්වල සාමාජිකයින්ගේද පවතින ගැටලු පිළිබඳ සොයා බැලීමට කටයුතු සංවිධානය කර තිබූ අතර රණක්ෂිත රණවිරුවන්හට රෝද පුටු, අත්වාරු, ඇස් කණ්නාඩි හා අවශ්‍ය ශල්‍ය වෛද්‍ය උපකරණ පරිත්‍යාග කිරීමක්ද මෙහිදී සිදු කරන ලදි.
තවද මීට සමගාමීව ආරක්ෂක අමාත්‍යාංශය, රණවිරු සේවා අධිකාරිය හා යුද්ධ හමුදා අධ්යක්ෂ මණ්ඩල නියෝජනය කරමින් පැමිණි නියෝජිතයින් රණවිරුවන් හා ළඟම ඥාතීන් මුහුණපා ඇති ඉඩම්, නිවාස, වැටුප් හා අනෙකුත් පරිපාලන ගැටලු සඳහා අවැසි උපදෙස් හා මගපෙන්වීම් ලබාදීමට ද කටයුතු සංවිධානය කරන ලදි.
