පොදු රාජ්ය මණ්ඩලීය මහ ලේකම් ගරු පැට්රිසියා ස්කොට්ලන්ඩ් (Patricia Scotland) මැතිනිය සහ ගරු වාරිමාර්ග, ක්රීඩා හා යෞවන කටයුතු අමාත්ය රොෂාන් රණසිංහ මැතිතුමා අතර විශේෂ සාකච්ඡාවක් අද (02) ක්රීඩා හා යෞවන කටයුතු අමාත්යාංශයේදී පැවැත්විණි.
එතුමිය විසින් ආසියා හා පැසිපික් කලාපයේ යොවුන් පාර්ලිමේන්තුව පිහිටුවීම සඳහා මූලිකත්වය ගැනීමට ක්රීඩා හා යෞවන කටයුතු අමාත්යාංශයට අවස්ථාව ලබා දෙන ලදි. සියලුම පාසල් ළමුන් සඳහා එක් ක්රීඩාවක් හෝ අනිවාර්ය කිරීමත්, අධ්යාපන හා සෞඛ්ය අමාත්යාංශය අතර ඒකාබද්ධව කටයුතු කිරීමට අදාළ වැඩපිළිවෙළක් සකස් කිරීමටත් අවධානය යොමු විණි.
ක්රීඩා හා තරුණ කටයුතු වර්ධනය කර ගැනීම උදෙසා රාජ්ය හා පෞද්ගලික සම්බන්ධතාවය ප්රවර්ධනය කිරීමටත් ශ්රී ලංකාවේ දැනට ක්රියාත්මක පොදු රාජ්ය මණ්ඩලීය ක්රීඩාවන් ඔලිම්පික් සම්මේලනය මඟින් ක්රියාත්මක කිරීමේදී ඇතිවන ගැටලු අවම කර ගැනීම උදෙසා, පොදු රාජ්ය මණ්ඩලීය ක්රීඩා සඳහා පොදු රාජ්ය මණ්ඩලීය ක්රීඩා සම්මේලනය ශ්රී ලංකාවේ ස්ථාපිත කිරීමට තීරණය විය.
පොදු රාජ්ය මණ්ඩලීය නියෝජ්ය ලේකම් මහාචාර්ය ලුයිස් ෆැන්ෂෙස්ෂි (Luis Franceschi) මහත්මිය, වාරිමාර්ග අමාත්යාංශයේ ලේකම් යු.ඩී.සී. ජයලාල් මහතා, ක්රීඩා හා යෞවන කටයුතු අමාත්යාංශ ලේකම් කේ.පී. මහේෂන් මහතා, ජාතික ක්රීඩා සභාවේ සභාපති අර්ජුන රණතුංග මහතා, ජාතික තරුණ සේවා සභාවේ සභාපති ආචාර්ය තිරාන් ද සිල්වා මහතා ඇතුළු මහත්ම මහත්මීන් මේ සදහා සහභාගී වුහ.
