මාවතගම පිලැස්ස මාස් කොළණිය ප්රදේශයේ පදිංචි තරුණ දෙපිරිසක් අතර ඊයේ (11) රාත්රියේ ඇතිවූ ගැටුමෙන් තරුණයෙකු මරණයට පත්ව තවත් පුද්ගලයන් දෙදෙනෙකු තුවාල ලැබීමේ සිද්ධියෙන් පසුව එම ප්රදේශයේ ආරක්ෂාව සඳහා පොලිස් විශේෂ කාර්ය බළකාය යෙදවීමට පියවර ගෙන තිබුණා.
දෙපිරිස අතර ඇතිවූ ගැටුමේදී බරපතළ කැපුම් තුවාල ලැබූ 24 හැවිරිදි රංජිත් නමැති තරුණයා මරණයට පත්වූ අතර ගැටුමෙන් තුවාල ලැබූ පුද්ගලයන් දෙදෙනා ප්රතිකාර සඳහා කුරුණෑගල ශික්ෂණ රෝහලේ ප්රතිකාර ලබමින් සිටිනවා.
කලක සිට පැවති ආරවුලක් හේතුවක් වශයෙන් මෙම ගැටුම ආරම්භ වී ඇති අතර කඩු, පිහියා, මන්නා වැනි කැපෙන ආයුධ වලින් පවා පහර දීම දක්වා මෙම ගැටුම උග්ර වී තිබෙනවා.
එහිදී එල්ලවූ ප්රහාරයකින් බරපතළ කැපුම් තුවාල සහිතව එම තරුණයා මරණයට පත්ව ඇති බවයි පොලීසිය පවසන්නේ.
මෙම ඝාතනය සම්බන්ධයෙන් තරුණයන් සිවු දෙනෙකු මේ වන සැකපිට අත්අඩංගුවට ගෙන සිටින අතර ගැටුමට සම්බන්ධ ප්රධාන සැකකරුවෙකු ප්රදේශයෙන් පලා ගොස් තිබෙනවා. කෙසේ වෙතත් ඔහු අත්අඩංගුවට ගැනීම සඳහා විමර්ශන සිදු කරන බවයි පොලිසිය ප්රකාශ කළේ.
සිංහල ජාතිකයෙකු වන මෙම සැකකරු මුස්ලිම් තරුණියක විවාහ කර ගැනීමෙන් පසුව මුස්ලිම් ආගමට ඇතුළත්වූ අයෙකු බවයි පොලිසිය පවසන්නේ.
මෙම ඝාතනයත් සමඟ කුපිතවූ ප්රදේශවාසීන් පිරිසක් ඝාතනයට සම්බන්ධ බව කියන සැකකරුවන්ගේ නිවාස වලට ගල්මුල් ප්රහාරයක් එල්ල කරමින් කලබලකාරී ලෙස හැසිරීමට උත්සාහ දැරීම හේතුවෙන් ප්රදේශයේ සාමය හා ජන ජීවිත ආරක්ෂා කිරීමට පොලිස් විශේෂ කාර්ය බළකායේ සෙබළුන් සමඟ පොලිස් නිලධාරීන් විශාල පිරිසක් යෙදවීමට පියවර ගෙන තිබෙනවා.
