ත්‍රිපෝෂ නිෂ්පාදනයට කොන්දේසි සහිතව අවසරය දෙන බව සෞඛ්‍ය සේවා අධ්‍යක්ෂ ජනරාල්වරයා පවසනවා.
ඔහු මේ පිළිබඳව සඳහන්කර සිටියේ ළමයින් සඳහා වන පාර්ලිමේන්තු සංසදය අමතමින්.
ඒ අනුව, නිශ්චිත කාල සීමාවකට, දිවයිනේ පෝෂණ අවශ්‍යතා හඳුනාගත් දරුවන් උදෙසා ලබා දීම සඳහා මෙලෙස කොන්දේසි සහිතව ත්‍රිපෝෂ නිෂ්පාදනයට අවසර ලබා දුන් බවයි සෞඛ්‍ය සේවා අධ්‍යක්ෂ ජනරාල්වරයා සඳහන්කර සිටියේ.
නියමිත ප්‍රමාණය ඉක්මවා ත්‍රිපෝෂවල ඇෆ්ලටෝක්සින් ප්‍රමාණය අධික වීම හේතුවෙන් වයස මාස 6ත් අවුරුදු 3ත් අතර දරුවන්ට ලබා දෙන ත්‍රිපෝෂ නිෂ්පාදනය තාවකාලිකව නවතා දැමීමට කටයුතු කළ බවයි සෞඛ්‍ය අංශයේ නිලධාරින් සඳහන් කර සිටියේ.
එම වයස් ඛාණ්ඩයේ දරුවන්ට ලබා දෙන ත්‍රිපෝෂවල ඇෆ්ලටෝක්සින් අගය 1කට වඩා අඩු විය යුතු වුවත් එම අගය ඉක්මවා ගොස් තිබූ නිෂ්පාදන හේතුවෙන් එම තීරණය ගනු ලැබූ බවයි එම නිලධාරින් වැඩිදුරටත් සඳහන්කර සිටියේ.
