රාජගිරිය, රෝයල් පාක් මිනීමැරුම් සිද්ධියේ මිනී මරුවා ජූඩ් ශමන්ත ජයමහට තීන්දු කර තිබූ මරණීය දණඩනයෙන් ඔහු මුදවා ජනාධිපති සමාව ප්රදානය කර නිදහස් කිරීමට හිටපු ජනාධිපති මෛත්රිපාල සිරිසේන ගත් තීරණය ආණ්ඩුක්රම ව්යවස්ථාවට පටහැනි බව ශ්රේෂ්ඨාධිකරණය අද (06) තීන්දු කළේය.
එම විත්තිකරුට ප්රදානය කරන ලද ජනාධිපති සමාව ආණ්ඩු ක්රම ව්යවස්ථාවට පටහැනි බවත් එය බලරහිත බවට තීන්දුවක් ලබා දෙන ලෙසත් ඉල්ලා කාන්තා හා මාධ්ය සාමූහිකය විසින් ඉදිරිපත් කළ මූලික අයිතිවාසිකම් පෙත්සමක තීන්දුව දෙමින් එස්. තුරෙයි රාජා, යසන්ත කෝදාගොඩ සහ ජනක් ද සිල්වා යන ප්රමුඛ ත්රිපුද්ගල ශ්රේෂ්ඨාධිකරණ විනිසුරු මඩුල්ලක් විසින් මෙම නියෝග ප්රකාශයට පත් කළහ.
මෙම ක්රියාව තුළින් ජනාධිපති මෛත්රීපාල සිරිසේන ආණ්ඩුක්රම ව්යවස්ථාව චේතනාවිතව උල්ලංඝනය කර ඇතැයි තීන්දු කළ ශ්රේෂ්ඨාධිකරණය මේ වන විට විදේශගතව සිටින අදාළ විත්තිකරු දේශීය හා ජාත්යන්තර සම්මුතින් උපයෝගී කරගෙන මෙරටට ගෙන්වීමට අවශ්ය නීතිමය පියවර ගන්නා ලෙසත් නීතිපතිවරයාට නියම කළේය.
තීන්දුවේ ප්රකාශ වූයේ හිටපු ජනාධිපතිවරයා විසින් අදාළ වරදකරු නිදහස් කරමින් දුන් ජනාධිපති සමාව බලරහිත බවය. එම නියෝගය නිකුත් වන්නේ හිටපු ජනාධිපති සිරිසේනට රුපියල් ලක්ෂ 10 වන්දියක් ද පෙත්සම්කරුට ගෙවිය යුතු බවට තින්දු වීමෙනි.
තවද අගතියට පත් තරුණියගේ මවට සහ පියාට රුපියල් මිලියනය බැගින් වන්දි ගෙවන ලෙසත් මෛත්රිපාල සිරිසේනට අධිකරණය නියෝග කළේය.
ඝාතන නඩුවේ පසුබිම
රාජගිරිය රෝයල් පාර්ක් සුපිරි නිවාස සංකීර්ණයේ පියගැට පෙළ මතදී 2005 වසරේ ජූනි 30 වෙනිදා 19 හැවිරිදි ඉවෝන් ජොන්සන් නමැති තරුණිය ගෙල සිර කර හිස පොළොවේ ගසා ඝාතනය කිරීමේ චෝදනාවට ජූඩ් ශ්රමන්ත ඇන්තනි ජයමහ එම වසරේ දීම අත්අඩංගුවට ගැනිණි.
ස්වීඩන් ජාතික පියෙකු හා ශ්රී ලාංකික මවකගේ දියණියක වූ ඉවොන් ජොන්සන් සිද්ධිය වූ දින ඇඟලා සිටි ඇඳුමකින් ගෙල සිර කර තිබූ අතර, හිස සිමෙන්ති පොළොවේ ගැසීමෙන් හිස් කබලේ බිඳීම් 64ක් තිබූ බව මරණ පරීක්ෂණ වාර්තාවේ සඳහන් වීය.
ඉන්පසු කොළඹ මහාධිකරණයේ පැවති දීර්ඝ නඩු විභාගයකින් පසු 2012 වර්ෂයේ දී ඔහුට දොළොස් වසරක සිර දඬුවමක් නියම කෙරිණි.
එයට එරෙහිව පැමිණිලිකරුවන් ඉදිරිපත් කළ අභියාචනයෙන් පසු අභියාචනාධිකරණය 2012 වර්ෂයේ දී ඔහුට මරණ දඬුවම ලබා දුන්නේය. පසුව විත්තිකරුවන් ශ්රේෂ්ඨාධිකරණයට අභියාචනය කරන ලද අතර, එහිදී නැවතත් විත්තිකරුට මරණ දඬුවම ස්ථීර කරමින් තීන්දුවක් ලබා දුන්නේය.
මහාධිකරණයට පමණක් නොව අභියාචනාධිකරණයට ද මරණ දඬුවම පැනවිය හැකි බවට 2014 වර්ෂයේ දී ශ්රේෂ්ඨාධිකරණය ඓතිහාසික තීන්දුවක් ලබා දුන්නේය.
කෙසේවෙතත්, ජූඩ් ශ්රමන්ත ඇන්තනිට 2016 වර්ෂයේ දී විශේෂ ජනාධිපති සමාවක් යටතේ ජීවිත සමාව හිමිවෙමින් ඔහුගේ දඬුවම ජීවිතාන්තය දක්වා සිර දඬුවමක් ලෙස ලිහිල් කළේය.
ජනාධිපති සමාව දෙවෙනි වරටත් ලැබෙන්නේ ඉන් අනතුරුවය. හිටපු ජනාධිපතිවරයා ජනාධිපතිවරයා ජූඩ් ජයමහට ජනාධිපති සමාව ලබා දීමට සූදානම් බවට ඉඟි මුල්වරට ප්රසිද්ධියේ පළ වන්නේ 2019 වසරේ ඔක්තොම්බර් 20 ය. ඔහු ඒ සම්බන්ධව ඉඟි කරන්නේ හිල්ටන් හෝටලයේ පැවති සැසියක් අමතමිනි.
එම ඉඟියත් සමාජය කම්පා කලේය. දැඩි විරෝධතා මතු වූයේය. ඝාතනයට ලක් වූ ඉවෝන් ජොන්සන්ගේ නැගණිය, කැරොලයින් ජොන්සන් ජනාධිපතිවරයාගේ ඉඟියෙන් දින තුනකට පසු සිය ෆේස්බුක් පිටුවේ දීර්ඝ සටහනක් පළ කරමින් කීවේ තම සොයුරිය සාහසික ලෙස ඝාතනය කළ පසු තමන්ගේ ලෝකය උඩු යටිකුරු වූ බව කීමත් ඌන ප්රකාශයක් බවය.
” මළගෙදර ආපු හැමෝම දැක්කා ඇයගේ දේහය පොළොව යටට යනවා, නමුත් එයත් සමඟ මමත් වැළලී ගියා. ඒ වගේම මගේ අම්මා සහ තාත්තාත්. අපේ ජීවිත නැවත ගොඩනගා ගන්න අපි සෑහෙන උත්සහයක් ගත්තා. නමුත් වසර 15කට පස්සේත් අපි තාම යුක්තිය වෙනුවෙන් සටන් කරනවා.”
“අවාසනාවට අපිට දැන් සූදානම් වෙන්න වෙලා තියෙන්නේ මෙතෙක් වුණ අතිශය නරකම සිද්ධියට මුහුණ දෙන්නයි. ඒ මගේ සහෝදරියගේ මිනීමරුවාට සමාව දීමයි. නමුත් අපි බලාපොරොත්තු වෙනවා යුක්තිය ජය ගනියි කියලා…,” කැරොලයින් සිය සටහනේ සඳහන් කර තිබුණි.
එහෙත් කැරොලයින් බලාපොරොත්තු වුන යුක්තිය ඒ වකවානුවේ ඉටු වූයේ නැත. රෝයල් පාරක් මිනීමරුවාට ජනාධිපති සමාව ලැබුනේය. ජූඩ් ශ්රමන්ත ඇන්තනි ජයමහ ට ජනාධිපති සමාව දීමට අදාළ නියෝගය 2019 නොවැම්බර් 10 සෙනසුරාදා බන්ධනාගාර බලධාරීන්ට ලැබිණි. ජූඩ් ශ්රමන්ත ඒ වනවිට සිරදඬුවම් විඳිමින් සිටියේ කුරුවිට බන්ධනාගාරයේය. 2019 නොවැම්බර් 10 දා සෙනසුරාදා සවස කුරුවිට බන්ධනාගාරයෙන් ඔහු නික්ම ගොස් තිබිණි.
ඝාතකයා නිදහස් කිරීමෙන් පසුදින ජනාධිපති මාධ්ය අංශය නිකුත් කළ නිවේදනය
සමාජය තුළ දැඩි ආන්දොලනයක් ඇති විය. ජනාධිපතිවරයා බලය අවලමේ යැවූ බවට චෝදනා බරපතල ලෙස එල්ලවන්නට වූයේය. පසුදිනම එනම් නොවැම්බර් මස 11 වැනි දින රෝයල් පාර්ක් මිනීමරුවාට සමාව දුන්නේ අතුරලියේ රතන හිමියන්, ආගමික නායකයින් සහ ශ්රේෂ්ඨාධිකරණ විනිසුරුවරුන්ගේ බලවත් ඉල්ලීමට බව ජනාධිපති මධ්ය අංශය නිවේදනයක් නිකුත් කරමින් කීවේය.
19 හැවිරිදි ඉවෝන් ජොන්සන්ගේ ඝාතනයට වරදකරු වූ ජූඩ් ශ්රමන්ත ඇන්තනි ජයමහට ජනාධිපති සමාව ලබාදීම වෙනුවෙන් අවශ්ය මැදිහත්වීම හා සම්බන්ධීකරණ කටයුතු පාර්ලිමේන්තු මන්ත්රී අතුරලියේ රතන හිමියන් විසින් සිදුකළ බව ද ජූඩ් ශ්රමන්තගේ දෙමාපියන් ජනාධිපතිවරයා හමුවීමට සළස්වා මේ ගැන දීර්ඝ කරුණු පැහැදිලිකිරිමක් කිරීමට මැදිහත් වූයේ අතුරලියේ රතන හිමියන් බව ද එම නිවේදනයේ සඳහන් වූයේය.
මෙම සිද්ධිය තරුණයෙක් සහ තරුණියක් අතර ප්රේම සම්බන්ධයක් මුල්කරගත් ආරවුලක් බවත්, ජූඩ් ශ්රමන්ත බන්ධනාගාරය තුළ යහපත් කල් ක්රියාවෙන් යුක්තව ආචාර්ය උපාධිය හදාරමින් සිටින උගත් බුද්ධිමත් තරුණයෙක් බැවින් ඔහුට ජනාධිපති සමාව ලබාදෙන ලෙස අතුරලියේ රතන හිමියන් ලිඛිතව ජනාධිපතිවරයාගෙන් ඉල්ලා සිටි බවත් ජනාධිපති මාධ්ය අංශය නිකුත්කළ නිවේදනයේ සඳහන් විය.
බුද්ධ දේශනාව අනුව යමින් කරුණා, දයානුකම්පාවෙන් යුක්තව මෙම කරුණ සම්බන්ධයෙන් අවධානය යොමුකරන ලෙස අතුරලියේ රතන හිමියන් ඉල්ලා සිටි බව ජනාධිපති මාධ්ය අංශය කීවේය.
අතුරලියේ රතන හිමියන්ට අමතරව, බද්දේගම සමිත හිමියන් ඇතුළු ස්වාමින් වහන්සේලා පිරිසක් මෙන්ම දකුණු පළාත් කතෝලික පදවියේ රදගුරු රේමන්ඩ් වික්රමසිංහ රදගුරුතුමාත් මෙම තරුණයාට ජනාධිපති සමාව ලබාදෙන ලෙස ලිඛිත ඉල්ලීම් සිදුකළ බව ද, හිටපු ශ්රේෂ්ඨාධිකරණ විනිසුරු රෝහිණි මාරසිංහ ද මෙම තරුණයාට නිදහස ලබා දෙන ලෙස ජනාධිපතිවරයාට ඉල්ලීමක් කළ බවද එම නිවේදනයේ සඳහන් වූයේය.
මෙම ඉල්ලීම්වලට අමතරව මෙම ඝාතනය ක්ෂණික කෝපය මත සිදු වූවක් හා මෙම තරුණයා වසර 15ක් බන්ධනාගාරගතව යහපත් කල් ක්රියාවෙන් කටයුතු කිරීම වැනි කරුණුත් සළකා බලා ජනාධිපතිවරයා මෙම සමාව ලබාදීමට තීරණය කළ බව ද එම නිවේදනයේ සඳහන් විය.
ජනාධිපති සමාව සහ ජනාධිපති සමාව අභියෝගයට ලක් කිරීම
අධිකරණයකින් මරණ දඬුවම නියම වූ පුද්ගලයෙකුට සමාව ලබා දීමේ දී 34 (ඈ) වගන්තිය යටතේ ජනාධිපතිවරයාට යම් සීමා පනවා තිබේ. එවන් පුද්ගලයෙකු නිදහස් කිරීමට පෙර අදාළ නඩුව විභාග කළ විනිසුරුගෙන් වාර්තාවක් ලබා ගත යුතුය. එම වාර්තාව ජනාධිපතිවරයා අතට ලැබුණු පසු, ඒ ගැන නීතිපතිවරයාගෙන් උපදෙස් ලබා ගත යුතුය. එම වාර්තාව නීතිපතිවරයාට යැවිය යුත්තේ අදාළ උපදෙස් ලබා දීමෙන් පසු අධිකරණ විෂය භාර අමාත්යවරයාට යවන ලෙස උපදෙස් ලබා දෙමිනි.
ඉන්පසු, අදාළ අමාත්යවරයා සිය නිර්දේශ ද සඳහන් කරමින් වාර්තාව නැවත ජනාධිපතිවරයා වෙත යොමු කරනු ලබයි.
නීති විශාරදයන්ට අනුව ජනාධිපති සමාව ලබාදීමේදී සලකා බැලිය යුත්තේ කුමණ ආකාරයේ කරුණු දැයි නීතියේ පැහැදිලිව සඳහන් කර නැත. එමෙන්ම ජනාධිපති සමාව ලබා දීමට සිරකරුවන් තෝරා ගැනීමේ දී සම්මත් නිර්ණායක ද නැත. නීති විශාරදරයන් පවසන්නේ ජනාධිපතිවරයා රටේ සුභසිද්ධිය සහ සාධාරණත්වය වෙනුවෙන් කටයුතු කරන පුද්ගලයෙකු සේ සලකා සිය අභිමතය අනුව ක්රියා කිරීමට ආණ්ඩුක්රම ව්යවස්ථාවෙන් ලබා දී ඇති තවත් බලයක් ලෙස ජනාධිපති සමාව හඳනා ගන්නා බවය. නමුත් ජනාධිපතිවරයා සතුව ඇති අතිශය බලවත් විධායක බලය 19 වන ආණ්ඩුක්රම ව්යවස්ථා සංශෝධනයෙන් යම් දුරකට අඩු වී තිබිණි.
ආණ්ඩුක්රම ව්යවස්ථාවේ 35 වැනි වගන්තිය අනුව ජනාධිපති ධූරය දරන තැනැත්තා/තැනැත්තියට එරෙහිව කිසිදු ආකාරයක සිවිල් හෝ අපරාධ නඩු පැවරිය නොහැකි ලෙස සඳහන් වී ඇත. නමුත්, එම ප්රතිපාදන සහ මුක්තිය ඉවත් කරමින්, ජනාධිපතිවරයාට එරෙහිව නීතිපතිවරයා වග උත්තරකරු කරමින් මූලික අයිතිවාසිකම් කඩවීමේ නඩු පැවරීමේ හැකියාව 19 වෙනි සංශෝධනයෙන් ලැබී තිබිණි.
ජනාධිපති සමාව ලබා දීමට එරෙහිව කාන්තා හා මාධ්ය සංවිධාන සාමුහිකය විසින් මූලික අයිතිවාසිකම් පෙත්සමක් ගොනු කරන්නේ එම ප්රතිපාදන අනුවය.
පෙත්සම් විභාගය අතර අධිකරණයේ හෙළි වූ කරුණු
එම පෙත්සම් විභාගය අතරතුර අධිකරණයේ දී හෙළි වූයේ මෙම සමාව ප්රදානය කිරීමට අධිකරණ අමාත්යාංශය හරහා නීතිපති දෙපාර්තමේන්තුවෙන් හා දඬුවම ලබාදුන් විනිසුරුවරුන්ගෙන් වාර්තා කැඳවීමක් කර නොමැති බවය.
එහිදී ත්රිපුද්ගල විනිසුරු මඩුල්ලේ සාමාජික විනිසුරු යසන්ත කෝදාගොඩ ද කියා සිටියේ මෙම විත්තිකරුට සමාව ප්රදානය කිරීමට පෙර ඒ සම්බන්ධයෙන් දඬුවම් ලබා දුන් කොළඹ මහාධිකරණයේ සහ අභියාචනාධිකරණයේ විනිසුරුවරුන්ගෙන් වාර්තා කැඳවීමක් කර නොමැති බව පෙනී යන බවත් මෙම ක්රියාවලිය අදහාගත නොහැකි බවත් ය. වරදකරුවකුට සමාව ප්රදානය කිරීමේ ක්රියාවලියේ දී අනුගමනය කළ යුතු මූලික පියවරවත් මෙහිදී අනුගමනය කර නොමැති බවත් හෙළි විය.
සිරිසේන ලබා දුන් ජනාධිපති සමාවෙන් පසු යළිත් සාධාරණය ඉෂ්ට කරගැනීමට කැරොලයින්ලා ට අවුරුදු 5ක් බලා ඉන්නට සිදුවිය. දැන් ඒ සාධාරණය ඉෂ්ට වී තිබේ. මේ නඩු තීන්දුව යළිත් මේ රටට දෙන බලවත් පණිවිඩයක් සිහි කරමු. ධනය බලය සහිතව නීතියේ අවලමේ යවන විධායක ජනාධිපතිවරුන්ටත් කෙළවෙන්නේය. ඒ පණිවිඩය වත්මන් ජනාධිපති රනිල් වික්රමසිංහගේත් අවධානය සඳහා ය.
