නිරූපණ ශිල්පිනී පියුමි හංසමාලිගේ නමට ලියාපදිංචි කරන ලද BMW වර්ගයේ සුඛෝපබෝගී මෝටර් රථයක් රුපියල් කෝටි හයකට අධික වටිනා කුශ් සහ කොකේන් ගුවන් තැපැල් මගින් ආනයනය කිරීම සම්බන්ධයෙන් අත්අඩංගුවට ගත් කෝටිපති ව්‍යාපාරිකයාගේ දෙමහල් නිවසේ ගරාජයේ තිබී හමු වී තිබේ.
මෙම සැකකාර කෝටිපති ව්‍යාපාරිකයා කලක පටන් පොලිසිය මගහරිමින් සැඟව සිට ඇති අතර පොලිස් මත්ද්‍රව්‍ය නාශක කාර්යාංශය විසින් සිදු කල දීර්ඝ විමර්ශනයකින් පසුව ඔහුව අත්අඩංගුවට ගෙන ඇත.
මෙසේ අත්අඩංගුවට ගෙන ඇත්තේ මරදාන ප්‍රදේශයේ ප්‍රධාන පෙලේ වාහන අමතර කොටස් ගෙන්වන ආයතනයක හිමිකරුවෙක්.
අදාළ සැකකරු නාරහේන්පිට ප්‍රදේශයේ පෞද්ගලික රෝහලක සිට පිටතට පැමිණෙමින් සිටියදී මෙසේ ඔහුව අත්අඩංගුවට ගෙන ඇති බව සඳහන්.
සැකකරු මෙම වසර මුලදී නාවල කොස්වත්ත ප්‍රදේශයේ සුපිරි නිවසක කුලී පදනම මත පදිංචිව සිටියදී මත්ද්‍රව්‍ය තොගය පොලිස් මත්ද්‍රව්‍ය නාශක කාර්යාංශයේ සිර භාරයට ගැනුණි.
පොලීසිය වැඩිදුරටත් සඳහන් කලේ මෙම සිදුවීමත් සමග ඔහු එම නිවස අතහැර දමා නාවල පාසල් මාවතේ ආසන්නයේ සුපිරි නිවසකට පදිංචිය මාරු කර ඇති බවයි.
