ආයුධ පෙන්වීමට රැගෙන ගිය අවස්ථාවේ ඇති වූ වෙඩි හුවමාරුවකින් කොටහේන වෙඩික්කරුවන් දෙදෙනා මිය යාම සම්බන්ධයෙන් පොලිස්පතිවරයාගෙන් වාර්තාවක් කැඳවා ඇති බව මහජන ආරක්ෂක අමාත්‍ය ආනන්ද විජේපාල පවසයි.
මේ සම්බන්ධයෙන් මාධ්‍යවේදීයෙකු කළ විමසීමකදී, අමාත්‍යවරයා සඳහන් කළේ අදාළ සැකකරුවන් දෙදෙනාම එක් අත් විලංගුවක් දමා ආයුධ පෙන්වීම සඳහා රැගෙන ගොස් ඇති බවට පොලීසිය කරුණු වාර්තා කර ඇති බවයි.
ඉදිරියේදී අත්අඩංගුවට ගන්නා කිසිවෙකු හෝ අත්අඩංගුවේ සිටින කිසිවෙකුගේ ජීවිතයට හානි වීමට ඉඩ නොතබන බවද ආනන්ද විජේපාල මෙහිදී පවසා ඇත.
අපි අත් අඩංගුවේ ඉන්න කිසිවෙකු හෝ කිසිදු ජීවිතයකට හානි වෙන්න ඉඩ තියන්නේ නැහැ. අපේ වුවමනාව ඒක. අපි මේ රටට ලබා දුන් අදහස ඒක, පොලිස් අත්අඩංගුවට ගන්න අය වගේම ඔවුන් පාතාල ක්‍රියාකාරිකයින් වුවත් අධිකරණය ඔවුන් වරදකරුවන් කරන තුරු ඔවුන්ට නිදහස තියෙනවා, නිවැරදි පුරවැසියන් හැටියට ජීවත් වෙන්න. ඔවුන්ගේ ජීවිත ආරක්ෂා කිරීමේ වගකීම රජයක් හැටියට පොලීසිය හැටියට අපිට තියෙනවා. ඒ හින්දා අපි මේ සම්බන්ධයෙන් ක්‍රියාත්මක වෙනවා. පොලිස් නිලධාරීන්ගේ ආත්ම ආරක්ෂාව ගැනත් කටයුතු කරනවා.
