ගල්කිස්ස – වෙරළ පාරට හැරෙන මංසන්ධියේදී 19 හැවිරිදි තරුණයෙකු අද (05) උදෑසන 6.35ට පමණ වෙඩි ප්‍රහාරයකට ලක්වු අතර යතුරුපැදියකින් පැමිණි නාඳුනන පුද්ගලයින් දෙදෙනෙකු තරුණයාට වෙඩි තබා පලා ගොස් ඇත.
සිද්ධියෙන් තුවාල ලැබූ ඔහු කළුබෝවිල ශික්ෂණ රෝහලට ඇතුළත් කිරීමෙන් අනතුරුව ජීවිතක්ෂයට පත්ව ඇත.
මෙම තරුණයා නගර සභා සේවකයෙකු වන අතර, ඔහු වෙරළ පාරට හැරෙන මංසන්ධියේ අතුරු මාර්ගයක් අතු ගාමින් සිටියදී සැකකරුවන් දෙදෙනා යතුරුපැදියෙන් පැමිණ වෙඩි තබන අයුරු මීට පෙර CCTV කැමරාවක සටහන්ව තිබුණි.
වෙඩි ප්‍රහාරයට ලක්වූ තරුණයා අනතුරුව ප්‍රධාන මාර්ගය දෙසට දිවයද්දී සැකකරුවන් දෙදෙනා යළිත් ඔහු ලුහුබැඳ ගොස් වෙඩි තබා ඝාතනය කරන අයුරු තවත් CCTV කැමරාවක සටහන්ව ඇත.
දෙහිවල – ඕබන් පෙදෙසේ පදිංචිකරුවෙකු වන මෙම තරුණයා ඝාතනයට හේතුව මෙතෙක් අනාවරණ වී නොමැත.
ඔහුගේ මව මත්ද්‍රව්‍ය අලෙවි කිරීමේ චෝදනා මත මේ වනවිට බන්ධනාගාරගතව සිටින අතර, මියගිය තරුණයා 2023 වසරේදී මත්ද්‍රව්‍ය සම්බන්ධ චෝදනාවකට අත්අඩංගුවට පත්ව ඇති බවද තොරතුරු වාර්තා වේ.
එමෙන්ම ඔහු බඩෝවිට අසංක නැමැති මත්ද්‍රව්‍ය ජාවාරම්කරුගේ ඥාතියෙකු බවටද කරුණු වාර්තා වන අතර සිද්ධිය සම්බන්ධයෙන් වැඩිදුර විමර්ශන බස්නාහිර පළාත දකුණභාර නියෝජ්‍ය පොලිස්පති ගයංග මාරපනගේ අධීක්ෂණය යටතේ ක්‍රියාත්මකයි.
