වෙසක් පොහොය දිනයේ ජනාධිපති සමාව යටතේ අනුරාධපුර බන්ධනාගාරයේ රඳවා සිටි මූල්‍ය වංචාවකට දඬුවම් ලබා සිටි පුද්ගලයෙකු නිදහස් වීම පිළිබඳව පළ වන වාර්තා සම්බන්ධයෙන් ජනාධිපති මාධ්‍ය අංශය නිවේදනයක් නිකුත් කර තිබේ.
එම නිවේදනයේ දැක්වෙන්නේ, බන්ධනාගාර කොමසාරිස් ජනරාල් විසින් ජනාධිපති කාර්යාලය වෙත එවන ලද පොදු සමාව හිමි විය යුතු සිරකරු නාම ලේඛනය නම් 388 කින් සමන්විත වූ අතර එම ලේඛනයේ කිසිදු තැනක අනුරාධපුර බන්ධනාගාරයේ මුදල් වංචාවකට අදාළව සිරගතව සිටි පුද්ගලයාගේ නම ඇතුළත් නොවන බවයි.
මේ සිදුවීම පිළිබඳව විශේෂ පරීක්ෂණයක් සිදු කරන ලෙස ජනාධිපති ලේකම් කාර්යාලය විසින් ඊයේ (06) දින ‘ජනාධිපති සමාව යටතේ අනුමැතිය නොලැබූ සිරකරුවෙකු නිදහස් කිරීම සම්බන්ධව‘ යන ශීර්ෂය යටතේ අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කර ඇත.
ජනාධිපති මාධ්‍ය අංශය පවසන්නේ, මේ සම්බන්ධව විධිමත් පරීක්ෂණයක් පැවැත් වීමටත්, වගකිවයුතු නිලධාරීන්ට එරෙහිව විනය ක්‍රියාමාර්ග ගැනීමටත් ඉදිරියේදී කටයුතු කෙරෙනු ඇති බවයි.
