වැලිගම W-15 හෝටලයට වෙඩි තැබීමේ සිද්ධියේ සාක්ෂිකරුවන්ගෙන් කරුණු රැසක් අනාවරණය වෙයි : විස්තරය මෙන්න!

වැලිගම W 15 හෝටලයට වෙඩි තබමින් සිටි පිරිසට තමන් වෙඩි තැබුවේ යුක්තිය මෙහෙයුම අතරතුරදී බව, නඩුවේ 26 වැනි සාක්ෂිකරු වන වැලිගම පොලිසියේ සැරයන් අජිත් සිසිර කුමාර ප්‍රකාශ කරයි.
 
ඒ, වැඩ තහනමට ලක්ව සිටින පොලිස්පති දේශබන්දු තෙන්නකෝන් සම්බන්ධයෙන් විමර්ශනය කරන පාර්ලිමේන්තු පරීක්ෂණ කමිටුව හමුවේ ප්‍රකාශ ලබා දෙමිනි. 
 
2023 වසරේ දෙසැම්බර් 31වැනිදා වැලිගම ප්‍රදේශයේ හෝටලයක් ඉදිරිපිට වෙඩි තැබීමේ සිදුවීම සම්බන්ධයෙන් කරුණු රැසක් අනාවරණ වෙමින් ඇති අතර නඩුවේ 26 වැනි සාක්ෂිකරු වන වැලිගම පොලිසියේ සැරයන් අජිත් සිසිර කුමාරගෙන් ඊයේ පස්වරුවේ පාර්ලිමේන්තු පරීක්ෂණ කමිටුව ප්‍රශ්න කර ඇත. 
 
අදාළ වෙඩි තැබීම වනවිට ඒ ආසන්නයෙන් ගමන් කළ ජංගම පොලිස් රථයේ ප්‍රධානියා ලෙස සිට ඇත්තේ මෙම පොලිස් නිලධාරියායි. 
 
ඔහු ලබාදුන් සාක්ෂිය මෙසේය,
 
”ස්වාමීනි….යුක්තිය මෙහෙයුමට සමගාමීව මේ කියන දිනයේත් අපි ජංගම මුර සංචාරවල යෙදුණා. ඒ යනවිට රතිඤ්ඤා හඬට සමාන හඬක් ඇසුණා. ඒ හඬ ඇසෙනවාත් සමග අපි W 15 හෝටලය දෙසට ගමන් කළා. ඒ යනවිට අපි දැක්ක වෑන් රථයක් එම හෝටලය අසළ නවතා තිබෙනවා. ඒත් එක්කම මම දැක්කා, කළු පැහැති ඇඳුමක් ඇඳගත් පුද්ගලයෙකු වෑන් රථයේ පැති දොර විවෘත කරලා එහි වාඩිවෙලා W 15 හෝටලය දෙසට වෙඩි තියනවා. ඊට පස්සේ අපි වෑන් රථය හරස් කරලා අපේ පොලිස් ජීප් රථය වෑන් රථය ඉදිරිපිට නැවැත්තුවා. මම ඊට පස්සේ ජීප් රථයෙන් බැස්සා. ඒත් එක්කම මම දැක්කා, වෑන් රථය අපේ පොලිස් ජීප් රථය දෙසට අධික වේගයෙන් එනවා. මම ඒ මොහොතේ බය වුණා අපිටත් වෙඩි තියයි කියලා. ඊට පස්සේ මම කෑ ගහලා කිව්වා අපේ නිලධාරීන්ට වෙඩි තියන්න කියලා, ඊට පස්සේ තමයි අපේ නිලධාරීන් වෙඩි තිබ්බේ. වෑන් රථය අධික වේගයෙන් ඒ ස්ථානයෙන් පිටව ගියා, අපි ඒ පිළිබඳව වැලිගම පොලිස් ස්ථානයට දැනුම් දුන්නා. අපි පොලිසියට කිව්වා, අනිත් පොලිස් ස්ථානවලටත් මේ ගැන දැනුම් දෙන්න කියලා. අපේ ජීප් රථයේ දෝෂයක් තිබුණ නිසා, අපිට වෑන් රථය හඹා යාමට හැකියාවක් ලැබුණේ නැහැ. නමුත් අපි ටික දුරක් වෑන් රිය පසුපසින් ගියා. ඒ යනවිට මග හිටියා යුද හමුදා නිලධාරීන් දෙදෙනෙක්, අපි ඔවුන්ටත් ඒ පිළිබඳව දැනුම් දුන්නා. එවිට එම යුද හමුදා නිලධාරීන් දෙදෙනා එම වෑන් රථය පසුපස හඹා ගියා.” 
 
එවිට, පරීක්ෂණ කමිටුවේ සභාපති විනිසුරු ප්‍රීති පද්මන් සූරසේන විමසා සිටියේ, වෑන් රථයේ රියදුරුට හෝ එහි ඉදිරියේ සිටි නිලධාරියාට පොලිස් නිලධාරියෙකු එම ස්ථානයට පැමිණ ඇති බව හඳුනා ගැනීම සඳහා ප්‍රමාණවත් ආලෝකයක් එම ස්ථානයේ පැවතියා ද යන්නයි. 
 
”ඔව්, පැහැදිලිවම තිබුණා ස්වාමීනි.”
 
යනුවෙන් ඊට පිළිතුරු දුන් සාක්ෂිකරු ප්‍රකාශ කර ඇත. 
 
එම අවස්ථාවේ තමුන්ගේ අතින් කලබලයෙන් අවිධිමත්ව කළ නියෝගයක් නිසා මෙම වෙඩි තැබීම සිදු වුණා කියලා මම කියනවා, තමුන් එය පිළිගන්නවා ද යනුවෙන්, දේශබන්දු තෙන්නකෝන් වෙනුවෙන් පෙනී සිටි නීතිඥ එස්.වීරවික්‍රම සාක්ෂිකරුගෙන් විමසා ඇත. 
 
ඊට පිළිතුරු දුන් සාක්ෂිකාර වැලිගම පොලිසියේ සැරයන් අජිත් සිසිර කුමාර පැවසුවේ, තමන් එය පිළිනොගන්නා බවයි. 
 
ඉන් අනතුරුව මෙම නඩුවේ 25 වැනි සාක්ෂිකරු වන, දැනට වැඩ තහනමට ලක්ව සිටින කොළඹ අපරාධ කොට්ඨාසයේ රියැදුරු දුලීප ගිහාන් පියතිස්සගෙන් සාක්ෂි විමසීම ආරම්භ කර ඇති අතර අදාළ වෙඩි තැබීම සිදු වූ දිනයේ කොළඹ සිට වැලිගම දක්වා ගිය වෑන් රථයේ රියැදුරු ලෙස සේවය කර තිබුණේ මෙම පුද්ගලයායි. 
 
අදාළ ගමන පිටත්ව යාමට පෙර වාහනය සූදානම් කළා ද යනුවෙන් අපරාධ පරීක්ෂණ දෙපාර්තමේන්තු නිලධාරීන් ඔහුගෙන් ප්‍රශ්න කර ඇති අතර එහිදී  ඊට පිළිතුරු දුන් 25 වැනි සාක්ෂිකරු පවසා සිටියේ,
 
”ඔව්.. වාහනයේ බඳේ ස්ටිකර් ඇලෙව්වා. නිශාන්ත කියල නිලධාරියාගේ උපදෙස් මත තමයි මේ ස්ටිකර් ඇලෙව්වේ. මල්ලි කෙනෙක් එක්ක බයික් එකෙන් ගිහිල්ලා ඩාර්ලි පාරේ කඩයකින් තමයි ස්ටිකර් අරගෙන ආවේ.” 
 
වාහනයේ අංක තහඩුව මාරු කළා ද යනුවෙන් එහිදී අපරාධ පරීක්ෂණ දෙපාර්තමේන්තු නිලධාරීන් විමසා ඇත. 
 
ඊට පිළිතුරු දුන් 25 වැනි සාක්ෂිකරු පැවසුවේ, කොළඹ අපරාධ කොට්ඨාසයේ ස්ථානාධිපති ඇන්ස්ලම් ද සිල්වාගේ නිවසට ගිය අවස්ථාවේ අංක තහඩු මාරු කළ බවයි. 
 
ඒ සඳහා උපදෙස් දුන්නේ කවුරුන්ද යනුවෙන් අපරාධ පරීක්ෂණ දෙපාර්තමේන්තු නිලධාරීන් විමසූ පැනයට, නිශාන්ත මහත්මයාගේ උපදෙස් මත අංක තහඩු මාරු කළ බව ද සාක්ෂිකරු ප්‍රකාශ කර ඇත.
 
අංක තහඩු වෙනස් කරන්නේ ඇයි දැයි තමා නිශාන්ත නමැති නිලධාරියාගෙන් විමසූ බවත්, “උඹට වැඩක් නැහැනේ, කියපු දේ කරපං..!” යනුවෙන් එම නිලධාරියා තමන්ට ප්‍රකාශ කළ බවත් සාක්ෂිකරු පැවසුවා. 
 
එම අංක තහඩු දුන්නේ කවුරුන් ද යනුවෙන් අපරාධ පරීක්ෂණ දෙපාර්තමේන්තුව සාක්ෂිකරුගෙන් විමසූ විට ඔහු පැවසුවේ, ජීප් රථයේ පිටුපස කොටසේ ඇති අංක තහඩු ගෙන සවිකර ගන්නා ලෙස නිශාන්ත නමැති නිලධාරියා තමන්ට කියූ බවයි. 
 
ඉන් පසු 25 වැනි සාක්ෂිකරු අදාළ ගමන පිළිබඳව කල ප්‍රකාශ්‍ය මෙසේ ය, 
 
”අපි හෝටලය ළඟට මුලින්ම ගියා. ආ.. අර තියෙන්නේ හෝටලය කියලා නිශාන්ත මහත්තයා කිව්වා. ඊට පස්සේ ගාල්ල පැත්තට ආවා. එතන ලොකු ගහක් තිබුණා, එතන වාහනය නවත්වලා කට්ටිය බැස්සා. ආයෙත් හෝටලය ළඟට ගියා, එවිට එහි ආරක්ෂක නිලධාරියා ආවා. ඊට පස්සේ අපි එතනින් ගියා. එතකොට ඇන්ස්ලම් ද සිල්වා මහත්තයා කිව්වා, මේක හරි යන්නේ නැහැ, අපි යමු කියලා. එතකොට නිශාන්ත මහත්තයා කිව්වා, නෑ නෑ අපි ආව වැඩේ ඉවර කරලාම යමු කියලා. ඊට පස්සේ අපි ආයෙත් හෝටලය ළඟට ආවා. මදුරංග මහත්තයා ඊට පස්සේ තමයි වෙඩි තිබ්බේ. ඊට පස්සේ කවුරු හරි වාහනය ඇතුළෙන් කිව්වා පොලිසියෙන් පොලිසියෙන් කියලා. ඊට පස්සේ නිශාන්තයි, ඕඅයිසී දෙන්නම කිව්වා යමු යමු කියලා.”
 
තවදුරටත් සාක්ෂි දෙමින් සාක්ෂිකරු පැවසුවේ, හරක් කටාගේ මත්ද්‍රව්‍ය ජාලයේ පාටියක් අදාළ හෝටලයේ තිබෙන බවත්, එය නැවැත්වීම සඳහා ඊට වෙඩි තැබීමට යන බවත් නිලධාරීන් තමන්ට පැවසූ බවයි. 
 
එම කාරණය තමන්ට පැවසුවේ, අධිවේගී මාර්ගයේ කොක්මාදූව පිවිසුමෙන් පිටතට පැමිණීමෙන් පසුව බවත්, ඒ වන තෙක් යන්නේ කුමකට ද බව තමන් නොදැන සිටි බවත් නඩුවේ 25 වැනි සාක්ෂිකරු පරීක්ෂණ කමිටුව හමුවේ ප්‍රකාශ කර ඇත. 
 
එමෙන්ම, තමන් මීට පෙර අධිකරණය ඉදිරියේ අසත්‍ය තොරතුරු ඉදිරිපත් කළ බවත්, ඒ නිශාන්ත නමැති නිලධාරියාගේ උපදෙස් මත බවත් සාක්ෂිකරු පැවසූ අතර, එවිට හරස් ප්‍රශ්නයක් අසමින් අධිකරණය ඉදිරියේ දිවුරා බොරු කියුවා ද යනුවෙන් ප්‍රීති පද්මන් සූරසේන විමසා ඇත.
 
”ස්වාමීනි…නිශාන්ත මහත්තයා කිවුවා, අපි යනකොට මනුස්සයෙක් ලොකු බෑග් එකක් අතේ තියාගෙන හිටියා, ඔහු අපිට වෙඩි තිබ්බ නිසා අපිත් වෙඩි තිබ්බා කියලා කියන්න කිව්වා. මම ඒක මුලින්ම කිව්වා, නමුත් ඊට පස්සේ නීතිඥයෙකු මාර්ගයෙන් අපරාධ පරීක්ෂණ දෙපාර්තමේන්තුවට ගිහිල්ලා ඇත්ත කතාව කිව්වා.” 
 
ඉන් පසු දේශබන්දු තෙන්නකෝන් වෙනුවෙන් පෙනී සිටි නීතිඥ එස්.වීරවික්‍රම සාක්ෂිකරුගෙන් හරස් ප්‍රශ්න විමසීම ආරම්භ කර ඇත