අපරාධ පරීක්ෂණ දෙපාර්තමේන්තුව විසින් ‘උරුමය’ වැඩසටහන යටතේ ස්ථිර ඔප්පු ලබා දෙන බවට පොරොන්දු වී රුපියල් කෝටි 10 කට ආසන්න මුදලක් වංචා කළ බවට සැකකෙරෙන පුද්ගලයන් දෙදෙනෙකු අත්අඩංගුවට ගෙන ඇති බවට වාර්තා වේ.
එහිදී, වංචාවට සම්බන්ධ යැයි සැක 43 හැවිරිදි කාන්තාවක් පසුගිය 26 වැනිදා අත්අඩංගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාරගත කර ඇති අතර සිද්ධියට සම්බන්ධ අනෙක් 55 හැවිරිදි සැකකරු මහරගම ප්‍රදේශයේ පදිංචිකරුවෙකි. ඔහුව පසුගිය 29 වනදා අත්අඩංගුවට ගෙන කල්මුණේ මහේස්ත්‍රාත් අධිකරණයට ඉදිරිපත් කර තිබේ.
සැකකාරිය විසින් කල්මුණේ ප්‍රදේශයේ ව්‍යාපාරිකයින් 164 දෙනෙකුට “උරුමය” වැඩසටහන යටතේ ඔප්පු නොමැති ඉඩම් සඳහා ස්ථිර ඔප්පු ලබා දෙන බව පවසා තමා නීතීඥවරියක් බව පවසමින් එක් පුද්ගලයෙකුගෙන් රුපියල් ලක්ෂ 6 බැගින් ලබාගෙන ඇති බව විමර්ශනවලදී අනාවරණය වී ඇත.
පොලීසිය පැවසුවේ කල්මුණේ ප්‍රදේශයේ ව්‍යාපාරිකයින් 50 දෙනෙකු සිරිකොත පක්ෂ මූලස්ථානයට සහ කොළඹ ප්‍රදේශයේ ප්‍රසිද්ධ හෝටලයකට කැඳවා දේශපාලන කරුණු සාකච්ඡා කර රැවටීමට ලක්කරමින් ඔප්පු ලබා දෙන බව පවසා වංචනික ලෙස මුදල් ලබාගෙන ඇති බවට විමර්ශනවලදී අනාවරණ වී ඇති බවය.
විමර්ශන නිලධාරීන් විසින් සැකකරු භාරයේ තිබූ වංචනිකව ලබාගත් මුදලින් රුපියල් ලක්ෂ 20ක් අත්හිටුවීම සඳහා අධිකරණයෙන් නියෝග ලබා ගැනීමටද කටයුතු කර තිබේ.
