ලෝක අලි දිනය අදට (12) යෙදී තිබේ.
පරිසර අමාත්යාංශය සඳහන් කරන්නේ පරිසර පද්ධතියේ සුවිශේෂී සංකේතයක් මෙන්ම ජෛව විවිධත්වයේ වැදගත් පුරුකක් වන වනඅලීන්ගේ ආරක්ෂාව සහ පැවැත්ම පිළිබඳව ලොව පුරා අවධානය යොමුව ඇති බවයි.
මෙරට වසර ගණනාවක් පුරා සිදුවූ අක්රමවත් සංවර්ධන කටයුතු හේතුවෙන් අලි මංකඩ සහ වනඅලීන්ගේ සංචරණ මාර්ග අවහිර වී ඇති අතර, ඒ හේතුවෙන් අහිතකර පාරිසරික බලපෑම් රැසක් ඇතිවී තිබෙන බවද එම අමාත්යාංශය පෙන්වා දෙයි.
මේ අතර, වර්තමානයේ වනඅලීන් මුහුණදෙන තර්ජන පිළිබඳව පරිසර යුක්ති කේන්ද්රයේ විධායක අධ්යක්ෂ හේමන්ත විතානගේ මහතා අදහස් පළ කළේය.
ඔහු සඳහන් කළේ මෙරට වනඅලි ගහනය සම්බන්ධයෙන් විවිධ සංඛ්යා දත්ත ඉදිරිපත්ව ඇති බවත්, එම සංඛ්යාව පිළිබඳව යම් ගැටලු පවතින බවත්ය.
කෙසේ වෙතත්, මෙරට ප්රධාන ගැටලුවක් වී ඇත්තේ වසරකට වනඅලි 400කට වැඩි සංඛ්යාවක් මියයාම සහ අලි-මිනිස් ගැටුම් හේතුවෙන් මිනිස් ජීවිත 200කට ආසන්න සංඛ්යාවක් අහිමි වීම බව ඔහු පෙන්වා දුන්නේය.
මෙම වසර තුළ මේ වනවිට වනඅලි මරණ 180ක් සහ මිනිස් මරණ 56ක් වාර්තා වී ඇති බවත්, ඉන් වනඅලි මරණ 75ක් පමණ මිනිස් ක්රියාකාරකම් හේතුවෙන් සිදුව ඇති බවත් ඔහු සඳහන් කළේය.
වෙඩි තැබීම් හේතුවෙන් වනඅලි 30ක් පමණද, විදුලි සැර වැදීමෙන් 23 දෙනෙකුද, හක්කපටස් හේතුවෙන් 19 දෙනෙකුද මියගොස් ඇති බවද ඔහු වැඩිදුරටත් පැවසීය.
අලි-මිනිස් ගැටුම අඛණ්ඩව උග්ර වීමට ප්රධාන හේතුවක් ලෙස ඔහු පෙන්වා දෙන්නේ දෙපාර්ශ්වයටම මෙරට භූමි ප්රමාණයෙන් 40%කට වැඩි ප්රමාණයක් තුළ එකිනෙකා සමඟ ජීවත්වීමට සිදුවීමයි.
අලි-මිනිස් ගැටුමට විසඳුම් ලබාදීම සඳහා සිය සංවිධානය විසින් ඉදිරිපත් කර ඇති විධිමත් වැඩපිළිවෙළ ක්රියාත්මක කිරීමේ අවශ්යතාවද හේමන්ත විතානගේ මහතා අවධාරණය කළේය.
මේ අතර, ඊයේ (11) සවස අඹන්පොල පොලිස් වසමේ නැලව ප්රදේශයේදී වනඅලියෙකුගේ පහරදීමකින් පුද්ගලයෙකු මියගොස් තිබේ.
අඹන්පොල පොලිස් ස්ථානයට ලද තොරතුරක් මත මේ සම්බන්ධයෙන් විමර්ශන ආරම්භ කර ඇත.
මෙලෙස මියගොස් ඇත්තේ අඹන්පොල ප්රදේශයේ පදිංචි 43 හැවිරිදි පුද්ගලයෙකි.
තම කුඹුරට පැමිණි වනඅලීන් පළවා හැරීමට උත්සාහ කිරීමේදී ඔහු වනඅලි ප්රහාරයට ලක්ව ඇති බවට සිදුකළ වැඩිදුර විමර්ශනවලදී අනාවරණය වී ඇත.
