පවතින වියළි කාලගුණික තත්ත්වය හේතුවෙන් ජාතික වනෝද්යානවල ජලය හිඟවීමත් සමඟ වන සතුන් සඳහා බවුසර් මගින් ජලය ලබාදීම ආරම්භ කර ඇති බව වනජීවි දෙපාර්තමේන්තුව පවසයි.
ඒ අනුව යාල, විල්පත්තුව, කුමන සහ බූන්දල යන ජාතික වනෝද්යානවල ජලය එක්රැස් වන ස්ථාන වියළී යමින් පැවතීම හේතුවෙන් මෙම වැඩපිළිවෙළ ක්රියාත්මක කර තිබේ.
වනජීවි දෙපාර්තමේන්තුවේ අධ්යක්ෂ ජනරාල් රංජන් මාරසිංහ මහතා සඳහන් කළේ ජාතික වනෝද්යානවල සතුන්ට අවශ්ය ජලය සැපයීම සඳහා විශේෂ වැඩපිළිවෙළක් ක්රියාත්මක කර ඇති බවයි.
ප්රධාන ජාතික වනෝද්යානවල සූර්ය බලශක්තිය භාවිතයෙන් ක්රියාත්මක වන ජල පොම්ප සහ නළ පද්ධති මගින් සතුන්ට අඛණ්ඩව ජලය සැපයීමට කටයුතු කර ඇති බවද ඔහු පැවසීය.
එම නළ පද්ධති මගින් ජලය සැපයිය නොහැකි ප්රදේශ සඳහා බවුසර් යොදා ගනිමින් ජලය ලබාදීම මේ වනවිට ආරම්භ කර ඇති බවද අධ්යක්ෂ ජනරාල්වරයා සඳහන් කළේය.
පවතින කාලගුණික තත්ත්වයේ වෙනස්කම් අනුව වන සතුන්ට ලබාදෙන ජල ප්රමාණය අවශ්යතාවයට අනුව වැඩි කිරීමට හෝ අඩු කිරීමට හැකි බවද රංජන් මාරසිංහ මහතා වැඩිදුරටත් පැවසීය.
