තමන් වෙත පැවරී ඇති විධායක බලය හෝ ආණ්ඩුක්රම ව්යවස්ථාවෙන් හිමි බලතල කිසිදු අවස්ථාවක එහි සීමාව ඉක්මවා භාවිත නොකරන බව ජනාධිපති අනුර කුමාර දිසානායක මහතා පවසයි.
ශ්රී ලංකා නීතිඥ සංගමයේ නියෝජිතයින් සමඟ ඊයේ (12) පස්වරුවේ පැවති හමුවකදී ජනාධිපතිවරයා මේ බව සඳහන් කළේය.
එහිදී අදහස් දක්වමින් ජනාධිපතිවරයා පවසා ඇත්තේ, තමන් තනතුරේ රැඳී සිටීමට පමණක් පැමිණි අයකු නොවන බවත්, රටේ වෙනසක් ඇති කිරීම සඳහා අවශ්ය අවදානම් භාරගැනීමට සූදානම් බවත්ය.
තනතුර අහිමි වීමේ අවදානමක් ඇති වුවද, වෙනසක් සිදුකිරීම සඳහා එවැනි අවදානම් දැරීමට තමන් සූදානම් බවද ඔහු අවධාරණය කළේය.
ජනාධිපතිවරයා සඳහන් කළේ, පාස්කු ප්රහාරය සම්බන්ධ විමර්ශන ඇතුළු කටයුතු සිදුකරන අවස්ථාවලදී තමන්ගේ ආරක්ෂාව සම්බන්ධයෙන්ද අවදානම් පවතින බව දැන සිටින බවයි.
කෙසේ වෙතත්, අවදානමක් භාර නොගෙන සැබෑ වෙනසක් ඇති කළ නොහැකි බව තම විශ්වාසය බවද ජනාධිපතිවරයා ප්රකාශ කළේය.
“මගේ විධායක බලය හො අප සතුව තිබෙන බලයක් ආණ්ඩුක්රම ව්යවස්ථාවෙන් ඔබ්බට භාවිත කරන්නේ නැහැ. ඊළඟට උපුල් මහත්මයා කියපු අවදානම. ඒ කියන්නේ, මේ ව්යවස්ථා සංශෝධන නිසා අනිත් ජනාධිපතිවරයාට යන්න වුණා. ඔබටත් යන්න වෙයි. මම යන්න ලෑස්ති මිනිහෙක්. මම වාඩිවෙන්න බලාගෙන ආපු මිනිහෙක් නෙවෙයි. ඒ වගේම මම, මේ වෙනස කිරීම සඳහා අවදානම ගන්න ලෑස්ති මිනිහෙක්. වෙනසක් සිද්ධ වෙයි කියලා මම හිතන්නේ නැහැ අවදානමකින් තොරව. වෙනසක් හැමවිටම සිද්ධ වෙන්නේ අවදානමක් දරාගෙන.
හොඳම උදාහරණය කියන්නම්, පාස්කු පරීක්ෂණය දියත් කරලා තියෙන්නේ, බුද්ධි අංශයට. මගේ ආරක්ෂාවට වගකියන්නේ, කවුද? ඒත් පරීක්ෂණ යනවානේ? ඒ තුළ ජීවිත අවදානම තියෙනවා කියලා මම දන්නවා. නමුත් අවදානමක් දරාගන්නේ නැතිව වෙනසක් කරන්න පුළුවන් කියලා මම විශ්වාස කරන්නේ නැහැ. ඒ නිසා මම අවදානම ගන්න සූදානම්. ඒ අවදානම හමුවේ මගේ තනතුර අහිමි වෙනවා නම් ඒක ඉතා හොඳින් භාරගෙන මම පිටත්වෙලා යන්න ලෑස්තියි. ඒ්කට මම සූදානම්.”
