කොංගෝ රාජ්යය තුළ දැනට ශීඝ්රයෙන් පැතිර යන ඉබෝලා වෛරස් ව්යාප්තිය, ඉතිහාසයේ වාර්තා වූ දරුණුතම තත්ත්වය දක්වා වර්ධනය වීමේ දැඩි අවදානමක් මතුව තිබේ. ලෝක සෞඛ්ය සංවිධානයේ (WHO) අධ්යක්ෂ ජනරාල් ටෙඩ්රොස් ගෙබ්රියෝසස් මහතා මාධ්ය හමුවකදී අනතුරු අඟවා සිටියේ, පවතින ව්යාප්ති වේගය පාලනය කරගත නොහැකි වුවහොත් මෙම තත්ත්වය තවදුරටත් භයානක විය හැකි බවයි.
ඔහු වැඩිදුරටත් පෙන්වා දෙන්නේ, 2014 – 2016 කාලසීමාව තුළ පුද්ගලයින් 11,000කට වැඩි පිරිසකට ජීවිත අහිමි කරමින් පැතිර ගිය දරුණු ඉබෝලා වසංගතය පවා පරදවන තත්ත්වයකට මෙවර ව්යාප්තිය වර්ධනය විය හැකි බවයි.
මෙම වසරේ මැයි මස 15 වන දින සෞඛ්ය බලධාරීන් විසින් නිල වශයෙන් ප්රකාශයට පත් කරන ලද මෙම වසංගතය හේතුවෙන් මේ වන විට වාර්තා වී ඇති ආසාදිතයින් සංඛ්යාව: 4,300කට අධික වන බවයි. සිදුව ඇති මරණ සංඛ්යාව: 2,000කට අධික වේ.
කෙසේ වෙතත්, සෞඛ්ය නිලධාරීන් අනාවරණය කරන්නේ මැයි මාසයේදී නිල වශයෙන් හඳුනා ගැනීමට පෙර, එනම් පසුගිය පෙබරවාරි මාසයේ සිටම මෙම වෛරසය ජනතාව අතර රහසිගතව පැතිර යන්නට ඇති බවයි.
වෛරසය මුල් අවස්ථාවේදීම පාලනය කර ගැනීමට අපහසු වී ඇත්තේ එහි රෝග ලක්ෂණ මැලේරියාව හෝ හෙපටයිටීස් (Hepatitis) ලෙස වැරදියට වටහා ගැනීම නිසා බව ලෝක සෞඛ්ය සංවිධානයේ අප්රිකානු අධ්යක්ෂ වෛද්ය මොහොමඩ් ජනාබි සඳහන් කළේය.
මෙවර ව්යාප්තියට හේතු වී ඇත්තේ 2007 සහ 2012 වසරවලදී පමණක් වාර්තා වී ඇති ‘බුන්ඩිබුගියෝ’ (Bundibugyo) නම් දුර්ලභ ඉබෝලා වෛරස් ප්රභේදයයි. මෙතෙක් අනුමත කරන ලද කිසිදු එන්නතක් හෝ නිශ්චිත ඖෂධයක් මෙම ප්රභේදය සඳහා නොමැති වීම තත්ත්වය තවත් සංකීර්ණ කර ඇත.
නමුත් බලාපොරොත්තුවක් තබමින් ඔක්ස්ෆර්ඩ් විශ්වවිද්යාලය විසින් මෙම වෛරසයට එරෙහිව නව එන්නතක් නිපදවා ඇති අතර, එහි පළමු අදියරේ මිනිස් අත්හදා බැලීම් සිදු කිරීම සඳහා බ්රිතාන්ය ඖෂධ නියාමන අංශවලින් මේ වන විට අවසර හිමිව තිබේ.
කොංගෝවේ නැඟෙනහිර ප්රදේශයේ පවතින ගැටලුකාරී සහ දරුණු තත්ත්වයන් හේතුවෙන් සෞඛ්ය සේවකයින්ට ළඟා වීමට හැකි වී ඇත්තේ සමස්ත රෝගීන්ගෙන් 30%ක පමණ ප්රමාණයකට පමණි.
කෙසේ වෙතත්, තත්ත්වය වැඩිදුරටත් උග්ර වීම වැළැක්වීම සහ වෛරස් ව්යාප්තිය පාලනය කිරීම සඳහා ලෝක සෞඛ්ය සංවිධානය මැදිහත් වී හදිසි ආරක්ෂිත පියවර රැසක් ක්රියාත්මක කරමින් සිටියි.
