මිනිසුන්ගේ මුහුණේ ප්රකාශ වන විවිධ හැඟීම් හඳුනාගෙන ඒවා එකිනෙකින් වෙන්කර ගැනීමට සුනඛයින්ට හැකියාව ඇති බව වියානා විශ්වවිද්යාලයේ පර්යේෂකයින් සිදුකළ නව අධ්යයනයකින් අනාවරණය වී තිබේ.
පර්යේෂකයන් පවසන්නේ සුනඛයින්ගේ මෙම හැකියාව සම්බන්ධයෙන් මෙතෙක් ලැබී ඇති පළමු විද්යාත්මක සාක්ෂිය මෙය බවයි.
අධ්යයනය සඳහා සුනඛයින් 12 දෙනෙකු යොදාගෙන ඔවුන්ගේ මොළයේ ක්රියාකාරීත්වය නිරීක්ෂණය කර තිබේ. විවිධ හැඟීම් ප්රදර්ශනය කරන මිනිස් මුහුණුවල ඡායාරූප ඔවුන්ට පෙන්වා ඇති අතර, එම අවස්ථාවල මොළයේ ඇතිවන වෙනස්කම් හඳුනාගැනීම සඳහා යන්ත්ර ඉගෙනුම් තාක්ෂණය භාවිත කර ඇත.
පර්යේෂකයන්ට අනුව, ඉහළ සංජානන ක්රියාකාරීත්වයන් හා සතුටුදායක අත්දැකීම් සමඟ සම්බන්ධ temporal cortex සහ caudate nucleus යන මොළයේ ප්රදේශ නාඳුනන පුද්ගලයන්ගේ සතුටු මුහුණු නිරීක්ෂණය කළ අවස්ථාවලදී පමණක් සක්රීය වී තිබේ.
කෙසේ වෙතත්, කෝපය, බිය සහ දුක වැනි හැඟීම් එම මොළයේ ප්රදේශවලට සමාන ආකාරයක උත්තේජනයක් ඇති කර නොමැති බවද පර්යේෂණයෙන් අනාවරණය වී ඇත.
එහෙත් සුනඛයින්ගේ සමස්ත මොළයේ ක්රියාකාරීත්වය විශ්ලේෂණය කිරීමේදී බිය, කෝපය සහ දුක යන හැඟීම් එකිනෙකින් වෙන්කර හඳුනාගත හැකි විශේෂිත ක්රියාකාරී රටා හඳුනා ගැනීමට පර්යේෂකයන් සමත්ව තිබේ.
පර්යේෂිකා ලෝරා ක්වායා සඳහන් කර ඇත්තේ මිනිසුන්ගේ ඍණාත්මක මුහුණු ඉරියව් නිවැරදිව වෙන්කර හඳුනාගැනීමට සුනඛයින්ට හැකියාව ඇති බවට ලැබුණු පළමු සාක්ෂිය මෙය බවයි.
“අපගේ ඉරියව් තේරුම් ගැනීමට සහ අප සමඟ සහයෝගයෙන් කටයුතු කිරීමට බල්ලන් අප සමඟ පරිණාමය වී තිබෙනවා. මෙම කරුණ අවබෝධ කර ගැනීමෙන් අප ඔවුන් සමඟ සන්නිවේදනය කරන සහ ඔවුන් රැකබලා ගන්නා ආකාරය වෙනස් කර ගත හැකියි.”
මින් පසුව ශරීර භාෂාව, ස්වරයේ වෙනස්කම් සහ සුවඳ වැනි අනෙකුත් සංඥාද එකතු කර ගනිමින් සුනඛයින් තමන් වටා සිටින මිනිසුන් තේරුම් ගන්නේ කෙසේද යන්න පිළිබඳව පර්යේෂණ කිරීමට ඔවුන් අපේක්ෂා කරයි.
එමෙන්ම, මිනිස් සහ සුනඛ මොළය එකම හැඟීම් සංඥා සකසන්නේ කෙසේදැයි යන්න සංසන්දනය කිරීමටද ඔවුන් බලාපොරොත්තු වෙති.
කෙසේ වෙතත්, මෙම අධ්යයනය සඳහාකල් පවත්නා ආදරණීය පවුල්වල සුරතල් බල්ලන් පමණක් සහභාගී කරගත් බව පෙන්වා දෙන පර්යේෂකයෝ, එවැනි පරිසරයක නොවැඩුණු වෙනත් බල්ලන් මිනිස් හැඟීම්වලට ප්රතිචාර දක්වන ආකාරය මීට වඩා වෙනස් විය හැකි බවටද අවධාරණය කර සිටිති.
