ප්‍රබල සංවිධානත්මක අපරාධ කල්ලි නායකයකු වූ ගනේමුල්ල සංජීව නමැත්තා අලුත්කඩේ අධිකරණ සංකීර්ණය තුළදී වෙඩි තබා ඝාතනය කිරීමේ සිද්ධියට ආධාර අනුබල දුන් බවට චෝදනා එල්ල වූ ඉෂාරා සෙව්වන්දි නමැත්තිය අත්අඩංගුවට ගෙන ඇති බව වාර්තා වේ.
මහජන ආරක්ෂක අමාත්‍ය ආනන්ද විජේපාල මාධ්‍යය වෙත පවසා ඇත්තේ නේපාලයේ දී කළ මෙහෙයුමකදී ඇය අත්අඩංගුවට ගත් බවයි.
ඉෂාරා සෙව්වන්දි සමග තවත් පුද්ගලයින් 05 දෙනෙකු ද අත්අඩංගුවට ගෙන ඇති බව අමාත්‍යවරයා පවසා ඇත.
මේ අතර අපරාධ පරීක්ෂණ දෙපාර්තමේන්තුව, කොළඹ අපරාධ කොට්ඨාසය හා නේපාල පොලිසිය එක්ව මෙම මෙහෙයුම ක්‍රියාත්මක කරනු ලැබූ බව අමාත්‍යවරයා වැඩි දුරටත් පවසා ඇත.
“මීට දවස් 04කට කලින් CID එකයි කොළඹ අපරාධ කොට්ඨාසයයි නේපාලයට ගිහිල්ලා එහේ පොලිසියත් එක්ක කරපු මෙහෙයුමකින් මේ පිරිස අත්අඩංගුවට ගෙන තියෙන්නේ.”
මෙම සිද්ධියට සම්බන්ධ වෙඩික්කරු පුත්තලම, පාලවීය ප්‍රදේශයේදී පොලිස් විශේෂ කාර්ය බළකාය නිලධාරීන් කණ්ඩායමක් විසින් අත්අඩංගුවට ගෙන තිබූ අතර සැකකාර ඉෂාරා සෙව්වන්දි නමැත්තිය පළා ගොස් තිබිණි.
ගනේමුල්ල සංජිව නමැත්තා ඝාතනය කිරීම සඳහා යොදා ගත් ගිනි අවිය ‘දණ්ඩ නීති සංග්‍රහය’ පොතක් තුළ සඟවා අධිකරණ භුමිය තුළට ගෙනවිත් වෙඩික්කරු වෙත ලබා දී තිබුනේ ඉෂාරා සෙව්වන්දි බවට පොලිස් විමර්ශකයින් අනාවරණය කර ගෙන තිබිණි.
පසුව සෙව්වන්දි අත්අඩංගුවට ගැනීමට රටපුරා මෙහෙයුම් සිදුකළ අතර ඇය සැඟව සිටි බව කියන ස්ථාන රැසක් පොලිසිය විසින් පරීක්ෂා කරන ලදී.
එලෙස විමර්ශන කටයුතු සිදුකළ ද ඇයව අත්අඩංගුවට ගැනීමට පොලිසියට නොහැකි වූ අතර මාස 08 කට පසුව ඇය නේපාලයේ දී අත්අඩංගුවට ගැනීමට පොලිසිය සමත්ව ඇත.
