පාකිස්තානය විසින් ඇෆ්ගනිස්තානයේ පක්ටිකා ප්‍රදේශයට එල්ල කළ ගුවන් ප්‍රහාරය ඇෆ්ගනිස්තාන ජ්‍යේෂ්ඨම ක්‍රිකට් ක්‍රීඩකයන් දෙපළක්වන මොහොමඩ් නබි හා රෂිඩ් ඛාන් හෙළා දැක ඇති බව වාර්තා වේ.
මෙම ප්‍රහාරයෙන් එරට දේශීය ක්‍රිකට් ක්‍රීඩකයින් තිදෙනෙකු ඇතුළු 10 දෙනෙකු ජීවිතක්ෂයට පත්ව ඇත.
රෂීඩ් සිය සමාජ මාධ්‍ය ඔස්සේ ප්‍රකාශයක් නිකුත්කරමින් පවසන්නේ, ඇෆ්ගනිස්තානයට එල්ල වූ පාකිස්තාන ප්‍රහාරවලින් සිවිල් වැසියන්ගේ ජීවිත අහිමිවීම ගැන අතිශයින් කනගාටුවන බවයි.
“ජාත්‍යන්තර වේදිකාවේ තම රට නියෝජනය කිරීමට සිහින මැවූ කාන්තාවන්, දරුවන් සහ තරුණ ක්‍රිකට් ක්‍රීඩකයින්ගේ ජීවිත බිලිගත් ඛේදවාචකයක්.
සිවිල් වැසියන් ඉලක්ක කරගැනීම අතිශයින්ම ම්ලේච්ඡ ක්‍රියාවක්. මෙම අසාධාරණ සහ නීති විරෝධී ක්‍රියාව මානව හිමිකම් බරපතළ ලෙස උල්ලංඝනය කිරීමක්. එය නොසලකා හැරිය යුතු නොවේ.
අහිංසක ජීවිත බිලිගැනීම සැලකිල්ලට ගනිමින් පාකිස්තානයට එරෙහිව ඉදිරියේදී පැවැත්වීමට නියමිත තරගාවලියෙන් ඉවත්වීමට ගත් තීරණය පිළිගන්නවා.
මෙම දුෂ්කර අවස්ථාවේ දී මම අපගේ ජනතාව සමග. අපගේ ජාතික ගෞරවය අන් සියල්ලටම වඩා ඉදිරියෙන් තිබිය යුතුයි” රෂිඩ් පවසයි.
එමෙන්ම මොහොමඩ් නබි පවසන්නේ මෙම ප්‍රහාරය පක්ටිකාට පමණක් නොව සමස්ත ඇෆ්ගන් ක්‍රිකට් පවුලට සහ සමස්ත ජාතියටම ඛේදවාචකයක් බවයි.
“මෙම ප්‍රහාරය ඇෆ්ගනිස්තාන ප්‍රජාව කම්පනයට කළා. විපතට පත් වූවන් සහ ඔවුන්ගේ පවුල්වලට විශාල ශෝකයක් ඇතිකළා”
එමෙන්ම ඇෆ්ගන් ජාත්‍යන්තර ක්‍රිකට් ක්‍රීඩක ෆසල්හක් ෆාරුකි පවසන්නේ මෙම සිදුවීම ‘සමාව දිය නොහැකි දරුණු අපරාධයක්‘ බවයි.
