පාරිභෝගික කටයුතු අධිකාරියේ නව නියෝගයක් මගින් ජල බෝතල් සඳහා SLS නිෂ්පාදන සහතික සලකුණ අනිවාර්ය කර ඇති බව මධ්‍යම පරිසර අධිකාරිය (CEA) නිවේදනය කරයි.
මෙය 2026 අප්‍රේල් 1 වැනිදා සිට බලාත්මක වන අතර මහජනතාවගේ, විශේෂයෙන්ම ළමුන්ගේ ආරක්ෂාව තහවුරු කිරීම මෙහි ප්‍රධාන අරමුණ බව මධ්‍යම පරිසර අධිකාරිය පවසයි.
අනිවාර්ය SLS සහතිකය අදාළ වන නිෂ්පාදන:
දියර පාන රැගෙන යාම සඳහා නැවත භාවිතයට ගත හැකි ප්ලාස්ටික් බෝතල් – SLS 1616 පිරිවිතරයට අනුකූල විය යුතුය.
ළදරුවන් සඳහා ප්ලාස්ටික් ද්‍රව්‍යවලින් සාදන ලද පෝෂණ බෝතල් – SLS 1306 පිරිවිතරයට අනුකූල විය යුතුය.
2003 අංක 9 පාරිභෝගික කටයුතු අධිකාරිය පනතේ 12(1) වගන්තිය යටතේ,
දේශීය නිෂ්පාදන බෝතල් SLS සහතික සලකුණ දැරිය යුතුය.
ආනයන බෝතල් ශ්‍රී ලංකා ප්‍රමිති ආයතනය (SLSI) අනුමැතිය ලබා ගත යුතුය.
නීතිවිරෝධී ක්‍රියාකාරකම් තහනම් කරන අතර රෙගුලාසිවලට අනුකූල නොවන බෝතල් නිෂ්පාදනය, විකිණීම, ඇසුරුම්, ප්‍රවාහනය, ගබඩා, ආනයනය, බෙදාහැරීම හෝ ප්‍රදර්ශනය සපුරා තහනම් බව මධ්‍යම පරිසර අධිකාරිය පවසයි.
ඔක්තෝබර් මුලදී පාරිභෝගික කටයුතු අධිකාරිය විසින් මෙම බෝතල් වර්ග දෙක නියාමනය කරමින් ගැසට් නිවේදනයක් නිකුත් කර අතර SLSI විසින් නිකුත් කරන SLS සහතික සලකුණ එම නිෂ්පාදනවල අනිවාර්යයෙන්ම දැරිය යුතු බව එහි දැක්වේ.
