2006 වසරේ සිදු වු ගිනි අවි ආඥා පනතට යටත් වන සිදුවීමකට අදාළ සිදුවීමක් සම්බන්ධ නඩුවක් සඳහා හිටපු අමාත්‍ය නිමල් ලංසා, හිටපු මීගමුව නගරාධිපති දයාන් ලන්සා සහ හිටපු මීගමුව නාගරික මන්ත්‍රී බන්දුල නාඔටුන්න ඇතුළු සැකකරුවන් පිරිසක් ඊයේ (30) මීගමුව මහේස්ත්‍රාත් අධිකරණයේ පෙනී සිට ඇත.
ඒ එම සිදුවීමට අදාල නඩුව මීගමුව ප්‍රධාන මහේස්ත්‍රාත් රඛිත අබේසිංහ ඉදිරියේ යලි කැඳවූ අවස්ථාවේදීයි
එහිදී ප්‍රධාන මහේස්ත්‍රාත්වරයා කොච්චිකඩේ පොලිස් ස්ථානය වෙනුවෙන් අධිකරණයේ පෙනී සිටි පොලිස් නිලධාරීන්ට නියෝග කළේ හිටපු ඇමති නිමල් ලන්සා සහ හිටපු මීගමුව නාගරික මන්ත්‍රී බන්දුල නාඔටුන්න යන සැකකරුවන් දෙදෙනාගේ විමර්ශන කඩිනම් කරන ලෙසයි.
මෙම සිදුවීම සම්බන්ධව ඉදිරි විමර්ශන කටයුතු සඳහා වැඩිදුර උපදෙස් ලබා ගැනීම වෙනුවෙන් නීතිපති වෙත යොමු කරන බවද සඳහන් කල ප්‍රධාන මහේස්ත්‍රාත්වරයා, 2026 වර්ෂයේ ඔක්තෝබර් 26 වන දින නැවත කැඳවන බව දැනුම් දි ඇත.
2006.03.08 වන දින රාත්‍රි 10.30 ට පමණ කොච්චිකඩේ පල්ලන්සේන ප්‍රදේශයේ, ජොසප් මයිකල් පේරේරා මාවතේ හිටපු උප නගරාධිපති සුනිල් සිල්වාගේ නිවසට ඇතුළු වී දේපල මංකොල්ලකෑම සහ අහසට වෙඩි තැබීමේ සිද්ධියක් සම්බන්ධයෙනුයි මෙසේ පුද්ගලයන් 19 දෙනෙකු සැකකරුවන් කර මෙම නඩු පැවරීම සිදු කර ඇත.
මෙම නඩුව සම්බන්ධයෙන් එතෙක් අත්අඩංගුවට ගෙන අධිකරණයට ඉදිරිපත් කර නොතිබූ සැකකරුවන් දෙදෙනෙකු වන හිටපු අමාත්‍ය නිමල් ලන්සා සහ හිටපු නාගරික මන්ත්‍රී බන්දුල නාඔටුන්න පසුගිය සැප්තැම්බර් 28 වන දින නීතිපතිවරයාගේ උපදෙස් මත අත්අඩංගුවට ගෙන අධිකරණය වෙත ඉදිරිපත් කළ අතර, ඒ ඔවුන් අත තුවක්කු තිබු බවට සාක්ෂිකරුවන් තිදෙනෙකුගේ සාක්ෂි ප්‍රකාශ මත මෙම සිදුවීමට සම්බන්ධ සැකකරුවන් ලෙස නම් කිරීමෙන් අනතුරුවයි.
ගිනි අවි අඥා පනතේ 26 වෙනි වගන්තිය ප්‍රකාරව වැරදි සිදුව ඇති බවත්, තව දුරටත් විමර්ශන සිදු වන බැවින් සාක්ෂිකරුවන්ට බලපැම් සිදු විය හැකි බැවින් ද හිටපු ඇමති නිමල් ලන්සාව සහ හිටපු මීගමුව නාගරික මන්ත්‍රී බන්දුල නාඔටුන්න යන දෙදෙනා එදින නඩුකරයේ දී රක්ෂිත බන්ධනාගාරගත කරන ලද අතර, සැප්තැම්බර් මස 08 වන දින හිටපු ඇමති නිමල් ලංසා මීගමුව මහාධිකරණයට ඉදිරිපත් කල මෝසමක් මත, ඇප ලබා දීමට අධිකරණය තීරණය කර ඇත.
තව ද හිටපු මීගමුව නාගරික මන්ත්‍රී බන්දුල නාඔටුන්න සඳහා සැප්තැම්බර් 12 වැනි දින මීගමුව මහේස්ත්‍රාත් අධිකරණය මගින් ඇප ලබා දෙන ලදී.
ඒ අනුව මෙම සිදුවීමට අදාළ මීළඟ නඩු වාරය එලඹෙන වසරේ ඔක්තෝබර් මස 26 වැනි දින යළි විභාගයට ගැනීමට නියමිතයි.
