ගම්පහ උඩුගම්පොළ ප්‍රදේශයේ බණ්ඩාරනායක අනුස්මරණ පොදු පුස්තකාලය ඉදිරිපිටදී තමන් ‘රන්මල් කොඩිතුවක්කුගේ නංගී’ යැයි පවසා පොලිස් නිලධාරීන්ගේ රාජකාරියට බාධා කරමින් කලහකාරී ලෙස හැසිරුණු කාන්තාවකගේ වීඩියෝවක් සමාජ මාධ්‍යවල සංසරණය වේ.
මාර්ග නීති උල්ලංඝනය කිරීමක් සම්බන්ධයෙන් රථ වාහන කොට්ඨාස භාර පොලිස් නිලධාරීන් විසින් මෙම කාන්තාව පරීක්ෂා කිරීමේදී පොලිසියට දැඩි විරෝධය පළ කරන අයුරු එම වීඩියෝවෙහි සඳහන් ව ඇත.
එම කාන්තාව රථ වාහන නීති කඩ කරමින් වාහනය ධාවනය කරන බවට පොලිස් නිලධාරීන් එහිදී චෝදනා කරන අතර, ඇය එම චෝදනාව දැඩි ලෙස ප්‍රතික්ෂේප කරන අයුරු එහිදී දක්නට ලැබේ.
කෙසේවෙතත් එම අවස්ථාවේදී ඇය තමන් රන්මල් කොඩිතුවක්කුගේ සහෝදරිය බව පවසමින් පොලිස් නිලධාරීන්ට තර්ජනය කරමින් සහ රාජකාරියට බාධා වන අයුරින් හැසිරෙනු දක්නට ලැබේ.
තමන් කිසිදු වරදක් කර නොමැති බවත්, සියලු ලියකියවිලි තමන් සතුව ඇති බවත් පවසමින් පොලිස් නිලධාරීන්ගෙන් එම කාන්තාව සිය රියදුරු බලපත්‍රය උදුරා ගන්නා ආකාරය වීඩියෝවල සටහන්ව ඇත.
එමෙන්ම මාර්ගයේ සිටි පිරිසද ඇයට විරෝධය පළ කළ අතර එය නොතකා එම කාන්තාව සිය මෝටර් රථයෙන් පිටවීමට උත්සාහ කරන අයුරුද වීඩියෝවල දැකගත හැකි විය.
කෙසේවෙතත් අදාළ කාන්තාව පොලිස් අණ නොතකා පලා යමින් සිටියදී මිනුවන්ගොඩ ප්‍රදේශයේදී අත්අඩංගුවට ගත් බව පොලිසිය පවසයි.
පොලීසිය සඳහන් කළේ, අදාළ කාන්තාව ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කුගේ සහෝදරිය බවට පවසන ප්‍රකාශය සත්‍ය නොවන බවයි.
එමෙන්ම සිදු කළ විමර්ශනවලදී ඇය ජ්‍යෙෂ්ඨ නියෝජ්‍ය පොලිස්පතිවරයාට කිසිදු ඥාති සම්බන්ධතාවයක් තිබෙන තැනැත්තියක් නොවන බවට අනාවරණය වී තිබේ.
වයස අවුරුදු 46ක කාන්තාවක් වන ඇය මීට පෙරද මාර්ග නීති කඩකිරීම්වලට අදාළව දඩ කොළ ලබා ඇතත්, ඒවා කිසිඳු ගෙවීමකින් තොරව සිය රියදුරු බලපත්‍රය ළඟ තබාගෙන සිටි බවට පොලීසිය සඳහන් කරයි.
ඒ අනුව එම කාන්තාව අන් අයෙකු ලෙස පෙනී සිටීම, අපරික්ෂාකාරී රිය ධාවනය, පොලිස් අණ නොතකා ධාවනය, සාපරාධී බලහත්කාරය පෑම සහ යන චෝදනා යටතේ අද (01) දි ගම්පහ මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
