අනුරාධපුර, ගලෙන්බිදුණුවැව ප්රදේශයේ පුද්ගලයෙකු විසින් නිවසක් ගිනිතැබීමෙන් සිදුවු අනතුරකින් බරපතළ තුවාල ලබා රෝහල්ගත කර සිටි 15 හැවිරිදි දියණියත් ජීවිතක්ෂයට පත්ව තිබේ.
මෙම ගිනි තැබීම පසුගිය (06) වනදා සිදු වූ අතර, ගින්නට හසුවී 43 හැවිරිදි ගිනි තැබූ පුද්ගලයා සහ ඔහුගේ 13 හැවිරිදි දියණිය එම ස්ථානයේම මියගොස් තිබුණි.
ගිනිගැනීමෙන් ඇතිවූ බරපතළ තුවාල හේතුවෙන් මියගිය පුද්ගලයාගේ බිරිඳ, දරුවන් දෙදෙනා සහ නැන්දණිය තුවාල ලබා රෝහල්ගත කර සිටියදී 36 හැවිරිදි බිරිඳ ජීවිතක්ෂයට පත්ව ඇති බව ගලෙන්බිඳුණුවැව පොලීසිය සඳහන් කරයි.
අද (10) උදෑසන අනුරාධපුර ශික්ෂණ රෝහලේ ප්රතිකාර ලබමින් සිටි වයස 15 හැවිරිදි වැඩිමහල් දියණිය ජීවිතක්ෂයට පත්වී ඇති අතර, ඇයගේ දේහය මෘත ශරීරාගාරයට තැන්පත් කර තිබේ. අද දින එම දේහයේ පශ්චාත් මරණ පරීක්ෂණය සිදුකිරීමට නියමිතව ඇත.
ගලෙන්බිඳුණුවැව පොලිස් වසමේ, නුවරගම් කොළනිය, පඩිකාරමඩුව ප්රදේශයේ මෙම සිද්ධිය සිදුව තිබේ. මෙම ගින්නට හසුවී 20 හැවිරිදි පුත්රයා සහ 66 හැවිරිදි නැන්දණිය තවමත් පිළිස්සුම් තුවාල ලබා අනුරාධපුර ශික්ෂණ රෝහලේ ප්රතිකාර ලබමින් සිටිති.
පියා නිවසට ගිනි තැබූ අවස්ථාවේ නිවසේ සිටියේ බිරිඳ, දියණියන් දෙදෙනා සහ බිරිඳගේ මව පමණක් වන අතර, පිරිමි දරුවා සිද්ධිය දැකීමත් සමඟ එම ස්ථානයට පැමිණි තිබේ. පසුව මව සහ සහෝදරියන් බේරා ගැනීමට යෑමේ දී පුත්රයා ද පිළිස්සුම් තුවාල ලබා ඇත.
පොලීසිය සොයාගත් තොරතුරු අනුව, ගිනි තැබූ පුද්ගලයා නිතර මත්පැන් පානය කර බිරිඳට පහරදීම් සිදුකරන අතර, ඔවුන් අතර පවතින ආරවුල් හේතුවෙන් අවස්ථා කිහිපයකදී ගලෙන්බිඳුණුවැව පොලීසිය වෙත පැමිණිලි සිදුකර දෙපාර්ශ්වයට අවවාද කර ඇති බවද විමර්ශන වලදී අනාවරණය වී ඇත.
