වෙරළබඩ පොලිස් වසමේ ජින්තුපිටිය ප්රදේශයේදී ඉකුත් (14) වැනිදා පුද්ගලයෙකු වෙඩි තබා ඝාතනය කර තවත් සිව්දෙනෙකුට තුවාල සිදුකිරීමේ සිද්ධියට ආධාර අනුබල දුන්බව කියන සැකකරුවෙකු සහ සැකකාරියක කොළඹ උතුර කොට්ඨාස අපරාධ විමර්ශන කාර්යාංශය මගින් අත්අඩංගුවට ගෙන තිබේ.
කොළඹ උතුර කොට්ඨාස අපරාධ විමර්ශන කාර්යාංශයේ නිලධාරීන් කණ්ඩායමක් විසින් ඊයේ (27) කඩවත, සූරියපාළුව ප්රදේශයේදී සිදුකළ මෙහෙයුමකදී අයිස් මත්ද්රව්ය ග්රෑම් 06 යි මිලිග්රෑම් 540 ක් සමග 44 හැවිරිදි සැකකරුවෙකු අත්අඩංගුවට ගෙන තිබුණි.
ඔහුගෙන් ලද තොරතුරු මත වැල්ලම්පිටිය, වෙහෙරගොඩැල්ල ප්රදේශයේදී අයිස් මත්ද්රව්ය ග්රෑම් 03 යි මිලිග්රෑම් 100 ක් සමග 29 හැවිරිදි සැකකාරියක ද අත්අඩංගුවට ගැනීමට පොලිසිය සමත් විය.
අත්අඩංගුවට ගත් සැකකරු සේදවත්ත ප්රදේශයේ පදිංචිකරුවකු වන අතර, ඔහු ජින්තුපිටිය වෙඩි තැබීමෙන් පසු වෙඩික්කරු සහ ගිනිඅවිය රැගෙන පළාගිය ත්රීරෝද රථයේ රියදුරු බවට මූලික විමර්ශනවලදී අනාවරණය වී ඇතැයි පොලිසිය පවසයි.
අත්අඩංගුවට ගත් සැකකාරිය මෙම අපරාධය සඳහා ඔහුට සහාය දක්වා ඇති බවට තොරතුරු හෙළිවී ඇති බව පොලිසිය සඳහන් කරයි.
අත්අඩංගුවට ගත් සැකකරු සහ සැකකාරිය සම්බන්ධයෙන් දින 07 ක රැඳවුම් නියෝග ලබාගෙන වැඩිදුර ප්රශ්න කිරීමට නියමිත බව පොලිසිය පවසයි.
වෙරළබඩ පොලිසිය සහ කොළඹ උතුර කොට්ඨාස අපරාධ විමර්ශන කාර්යාංශය සිද්ධිය සම්බන්ධයෙන් වැඩිදුර විමර්ශන මෙහෙයවයි.
