“සුපිලිපන් සංස්කෘතියක් – ක්ලීන් ශ්රී ලංකාවක්” යන තේමාව යටතේ නම් කර ඇති ජාතික සුපිලිපන් සතිය අද (27) සිට ජූලි 31 දක්වා දිවයින පුරා ක්රියාත්මක කිරීමට නියමිතය.
ජනාධිපති ලේකම් ආචාර්ය නන්දික කුමානායකගේ අත්සනින් නිකුත් කළ චක්රලේඛයකට අනුව, මෙම වැඩසටහන ජනාධිපති ලේකම් කාර්යාලය සහ “ක්ලීන් ශ්රී ලංකා” වැඩසටහන එක්ව සංවිධානය කරයි.
අද පෙරවරු 9.00ට ජනාධිපති ලේකම් කාර්යාලය ඇතුළු සියලු රාජ්ය ආයතනවල “ජාතික සුපිලිපන් දිවුරුම” ලබාදීම හා “ආචාර ධර්ම සංග්රහය” එළිදැක්වීම මඟින් මෙම සතියේ නිල ආරම්භය සනිටුහන් කෙරේ.
මෙම වැඩසටහනේ ප්රධාන අරමුණ වන්නේ රාජ්ය සේවයේ ගුණාත්මකභාවය, කාර්යක්ෂමතාව සහ විනිවිදභාවය තවදුරටත් වර්ධනය කිරීමත්, දූෂණයෙන් තොර යහපත් පරිපාලන සංස්කෘතියක් ගොඩනැගීමත්ය.
මෙහිදී “සුපිලිපන්භාවය” යන්නෙන් අදහස් කරන්නේ ස්වයං විනය, ස්වයං පාලනය සහ ස්වයං අධීක්ෂණය මත පදනම්ව හෘද සාක්ෂියට එකඟව, විනිවිදභාවයෙන් සහ සදාචාරාත්මකව රාජකාරි ඉටු කිරීමයි.
ජාතික සුපිලිපන් සතියේ දෛනික තේමා පහත පරිදි වේ.
ජූලි 27 – ආයතනික සුපිලිපන්භාවය ප්රවර්ධනය කිරීම.
ජූලි 28 – මූල්ය, ඩිජිටල්, ව්යවසායකත්ව හා තාක්ෂණික සුපිලිපන්භාවය ප්රවර්ධනය කිරීම.
ජූලි 29 – ආධ්යාත්මික, ආචාරධර්මීය, සංස්කෘතික හා සමාජීය සුපිලිපන්භාවය ප්රවර්ධනය කිරීම.
ජූලි 30 – මෙහෙයුම්, යටිතල පහසුකම්, සේවා සැපයීම සහ ශ්රම සුපිලිපන්භාවය ප්රවර්ධනය කිරීම.
ජූලි 31 – පාරිසරික, සම්පත් කළමනාකරණ, ග්රාමීය සංවර්ධන සහ ප්රජා සවිබලගැන්වීමේ සුපිලිපන්භාවය ප්රවර්ධනය කිරීම.
ජනාධිපති ලේකම් කාර්යාලයේ මඟපෙන්වීම යටතේ සෑම රාජ්ය ආයතනයකම ස්ථාපිත කර ඇති අභ්යන්තර කටයුතු ඒකක හරහා මහජනතාවට සිදුවන අපහසුතා සහ දූෂණ සම්බන්ධ පැමිණිලි භාර ගැනීමට ද කටයුතු යොදා ඇත.
QR කේත, විද්යුත් තැපෑල, ලිපි, දුරකථන ඇමතුම් සහ වෙබ් පණිවිඩ ඔස්සේ ජනතාවට තම පැමිණිලි ඉදිරිපත් කළ හැකි අතර, ඒ සම්බන්ධයෙන් ආයතන ප්රධානීන් ගන්නා ක්රියාමාර්ග නිරීක්ෂණය කිරීම සඳහා ජනාධිපති ලේකම් කාර්යාලය විසින් විශේෂ ඩිජිටල් පද්ධතියක් ද ක්රියාත්මක කිරීමට සැලසුම් කර තිබේ.
ජූලි 31න් පසුවද මෙම වැඩසටහන නතර නොකර, දෙසැම්බර් 31 දක්වා සියලු රාජ්ය සහ අර්ධ රාජ්ය ආයතන තුළ අඛණ්ඩව ක්රියාත්මක කිරීමට සැලසුම් කර ඇති බවද අදාළ චක්රලේඛයේ සඳහන් වේ.
