පුත්තලම සිට කොළඹ දක්වා ධාවනය වන සාමාන්ය සහ සුඛෝපභෝගී පුද්ගලික බස් රථ සේවා අද (27) පෙරවරුවේ සිට වර්ජනයක් ආරම්භ කර තිබේ.
වර්ජනයට එක්වූ බස් රථ සේවකයින් පවසන්නේ, කොළඹ සිට පුත්තලම හරහා ධාවනය වන දුර ගමන් සේවා බස් රථවල සේවකයින් විසින් පසුගිය දින කිහිපය තුළ තමන්ට පහරදීම් සිදු කළ බවයි. එම සිදුවීම් සම්බන්ධයෙන් පොලීසිය හෝ ජාතික ගමනාගමන කොමිෂන් සභාව මේ දක්වා කිසිදු ක්රියාමාර්ගයක් ගෙන නොමැති බවට ද ඔවුහු චෝදනා කරති.
ඔවුන් සඳහන් කළේ පසුගිය 20, 24, 25 සහ 26 යන දිනවල හලාවත සහ මුන්දලම ප්රදේශවලදී මෙම පහරදීම් වාර්තා වූ බවයි. එම ප්රහාරවලින් තුවාල ලැබූ කිහිපදෙනෙකු තවදුරටත් රෝහල්ගතව ප්රතිකාර ලබන බව ද ඔවුන් ප්රකාශ කළහ.
තමන්ට සාධාරණ විසඳුමක් ලැබෙන තෙක් මෙම වෘත්තීය ක්රියාමාර්ගය අඛණ්ඩව පවත්වාගෙන යන බව වර්ජනයේ නිරත පිරිස වැඩිදුරටත් සඳහන් කළේය.
