දෙවිනුවර ඓතිහාසික ශ්රී උත්පලපණ්ණ ශ්රී විෂ්ණු මහා දේවාලයේ වාර්ෂික ඇසළ පෙරහැර මංගල්යයට සමගාමීව අද (28) පැවැත්වෙන කාවඩි නර්තනය සහිත පෙරහැර වෙනුවෙන් විශේෂ ආරක්ෂක වැඩපිළිවෙළක් ක්රියාත්මක කර ඇති බව පොලීසිය පවසයි.
මහජන ආරක්ෂක අමාත්ය ආනන්ද විජේපාල මහතා සඳහන් කළේ, සාමාන්ය පොලිස් නිලධාරීන්ට අමතරව පොලිස් විශේෂ කාර්ය බළකායේ නිලධාරීන් ද ආරක්ෂක රාජකාරි සඳහා යොදවා ඇති බවයි.
දෙවිනුවර පෙරහැරේ කාවඩි නර්තනය සම්බන්ධයෙන් අපරාධ කල්ලිවලට අයත් බව කියන කණ්ඩායම් දෙකක් අතර මතුව තිබූ ගැටුම්කාරී තත්ත්වය හේතුවෙන් මෙවර එම නර්තනය අත්හිටුවීමට පොලිස්පතිවරයා පසුගියදා නිර්දේශ කර තිබුණි.
කෙසේවෙතත්, ඒ පිළිබඳ අවසන් තීරණය ගැනීම සඳහා ඊයේ (27) මාතර දිස්ත්රික් ලේකම් කාර්යාලයේ පැවති විශේෂ සාකච්ඡාවකදී, පසුගිය වසරවල කාවඩි නර්තනයට සහභාගී වූ සියලු කණ්ඩායම්වලට මෙවරත් ඊට එක්වීමට අවසර ලබාදීමට තීරණය කෙරිණි.
ඒ අනුව පොලීසියේ සෘජු අධීක්ෂණය යටතේ අද දිනයේ පැවැත්වෙන දෙවිනුවර ශ්රී උත්පලපණ්ණ ශ්රී විෂ්ණු මහා දේවාලයේ වාර්ෂික පෙරහැර මංගල්යයට කාවඩි නර්තනය ද එක් කිරීමට නියමිතය.
මේ අතර, පෙරහැරේ ආරක්ෂාව සම්බන්ධයෙන් මතුව ඇති තත්ත්වය දේශපාලන ක්ෂේත්රයේ ද සංවාදයට ලක්ව තිබේ.
එක්සත් ජාතික පක්ෂයේ හිටපු පාර්ලිමේන්තු මන්ත්රී සමන් රත්නප්රිය මහතා චෝදනා කළේ, රටේ ආරක්ෂාව සම්බන්ධයෙන් වත්මන් ආණ්ඩුව සතුව ප්රමාණවත් වැඩපිළිවෙළක් නොමැති බවයි.
ඊට ප්රතිචාර දක්වමින් ජාතික ජන බලවේගයේ පාර්ලිමේන්තු මන්ත්රී චන්දන සූරියආරච්චි මහතා පැවසුවේ, බුද්ධි තොරතුරු ලැබුණු අවස්ථාවල ඒවා නිසි ලෙස විශ්ලේෂණය කර තීරණ ගැනීම පොලීසියේ වගකීමක් වන අතර, එවැනි කරුණු ආණ්ඩුවේ අඩුපාඩුවක් ලෙස හුවා දැක්වීම ඇතැම් පාර්ශ්වයන්ගේ දේශපාලනික ප්රවේශයක් බවයි.
මේ අතර, හිටපු අමාත්ය පාඨලී චම්පික රණවක මහතා අවධාරණය කළේ, අපරාධ කල්ලි සාමාජිකයින්ට මෙරට සංස්කෘතික හා ආගමික උත්සව පාලනය කිරීමට හෝ ඒවාට බලපෑම් කිරීමට කිසිදු ඉඩක් ලබා නොදිය යුතු බවයි.
