පේරාදෙණිය ශික්ෂණ රෝහලට අදාළ ටෙන්ඩරයක් ලබාදෙන බව පවසමින් රුපියල් මිලියන 2ක (ලක්ෂ 20ක) අල්ලසක් ඉල්ලා ලබාගැනීමේ සිද්ධියක් සම්බන්ධයෙන් ව්යාපාරිකයෙකු සහ තවත් පුද්ගලයෙකු අල්ලස් හෝ දූෂණ චෝදනා විමර්ශන කොමිෂන් සභාව (CIABOC) විසින් අත්අඩංගුවට ගෙන තිබේ.
විමර්ශනවලට අනුව, පේරාදෙණිය ශික්ෂණ රෝහලේ 2027 වසර සඳහා මුළුතැන්ගෙයි ආහාර පිසීමට අවශ්ය ආහාර ද්රව්ය සැපයීම සඳහා කැඳවා තිබූ ටෙන්ඩරයට අදාළව මෙම සිද්ධිය වාර්තා වී ඇත.
පැමිණිලිකරුට ටෙන්ඩර් අයදුම්පත ඉදිරිපත් කිරීමට ඉඩ නොදී, එම කොන්ත්රාත්තුව ලබා ගැනීමට අවස්ථාව සලසා දෙන බව පවසමින් සැකකරු මුලින් රුපියල් ලක්ෂ 30ක අල්ලසක් ඉල්ලා ඇති බව සඳහන් වේ. එම ඉල්ලීම පසුව රුපියල් ලක්ෂ 25 දක්වාත්, අවසානයේ රුපියල් ලක්ෂ 20 දක්වාත් අඩු කර ඇති බව විමර්ශනවලදී අනාවරණය වී තිබේ.
එමෙන්ම, පැමිණිලිකරුගේ පියා සහ මාමාගේ නමින් ලබාගෙන තිබූ ටෙන්ඩර් අයදුම්පත් ඉදිරිපත් නොකර සිටීම සඳහා ද මෙම මුදල ඉල්ලා ඇති බව අල්ලස් කොමිෂන් සභාව සඳහන් කළේය.
අදාළ රුපියල් මිලියන 2ක අල්ලස ඉල්ලා ලබාගැනීම සහ ඒ සඳහා ආධාර අනුබල ලබාදීම යන චෝදනා මත ගම්පොල ප්රදේශයේ පදිංචි ව්යාපාරිකයෙකු සහ තවත් පුද්ගලයෙකු ඊයේ (27) ගම්පොල තැපැල් කාර්යාලය අසල රථගාලේදී අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගෙන ඇත.
