ජාතික ඖෂධ නියාමන අධිකාරිය (NMRA) සහ වෛද්ය සැපයුම් අංශය (MSD) අතර හටගෙන ඇති පරිපාලනමය සම්බන්ධීකරණ අඩුපාඩුවක් හේතුවෙන්, පිළිකා රෝගීන් සඳහා අතිශය අත්යවශ්ය ජීවිතාරක්ෂක එන්නත් 160,000ක තොගයක් බෙදා හැරීමට නොහැකිව ගබඩා තුළ සිරවී ඇති බව වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානය හෙළිදරව් කරයි.
එන්නත් අඩංගු පෙට්ටියේ මෙන්ම සිලින්ජරයේ ඉදිරිපස දත්ත, නිෂ්පාදිත සහ කල් ඉකුත්වීමේ දිනයන් ඇතුළු ගුණාත්මක තොරතුරු නිවැරදිව සටහන්ව තිබියදීත්, සිලින්ජර පිටුපස ලේබලයේ ඇති සුළු පරිපාලනමය තාක්ෂණික දෝෂයක් මුල් කරගනිමින් වෛද්ය සැපයුම් ඒකකය මෙම ඖෂධ තොගය භාරගැනීම ප්රතික්ෂේප කර ඇත.
සාමාන්යයෙන් රුපියල් 900ක් පමණ වන මෙම එන්නතක් මේ වන විට කළුකඩයේ රුපියල් 25,000කටත් වඩා වැඩි අධික මිලකට අලෙවි වන බවත්, එම මුදලට පවා සොයාගැනීමට නොමැති තරම් හිඟයක් නිර්මාණය වී ඇති බවත් වාර්තා වේ. කීමෝතෙරපි ප්රතිකාර ලබන රෝගීන්ගේ ප්රතිශක්තිය ඉහළ නැංවීම සඳහා මසකට රෝගීන් 25,000කට ආසන්න පිරිසකට මෙම එන්නත අත්යවශ්ය වේ.
අදාළ ලේබල් නිවැරදි කිරීම සඳහා මෙම තොගය නැවත නිෂ්පාදකයා වෙත යැවුවහොත් එය නැවත මෙරටට ලැබීමට අවම වශයෙන් මාස තුනක කාලයක් ගතවනු ඇත. එමගින් ඉදිරි මාස 3 තුළ පිළිකා රෝගීන් 75,000ක් පමණ දැඩි ජීවිත අවදානමකට ලක්වන බව වෘත්තීය සමිති සන්ධානය පෙන්වා දෙයි.
මෙම තත්ත්වය හදිසි ජාතික අවශ්යතාවක් ලෙස සලකා, සෞඛ්ය අමාත්යවරයා වහාම මැදිහත් වී සෞඛ්ය බලධාරීන්, පිළිකා රෝග විශේෂඥයන් සහ රුධිර රෝග පිළිබඳ විශේෂඥයන්ගෙන් සමන්විත හදිසි සාකච්ඡාවක් කැඳවා මෙම එන්නත් තොගය රෝගීන් වෙත මුදාහැරීමට කඩිනම් පියවර ගතයුතු බව අදාළ සංගමය වැඩිදුරටත් අවධාරණය කරයි.
