ශ්රී ලංකාවේ ජාතික බුද්ධිමය දේපළ කාර්යාලය යටතේ ක්රියාත්මක වන ශ්රී ලංකාවේ සංගීත නිර්මාණකරුවන්ගේ සහ ප්රකාශකයන්ගේ සංගමය විසින් ජාතික බුද්ධිමය දේපළ කාර්යාලය යටතේ හඳුන්වා දුන් නව රෙගුලාසි මාලාවක් පසුගිය අඟහරුවාදා සිට ක්රියාත්මක වන පරිදි ගැසට් කර ඇත. සංගීත නිර්මාණකරුවන්, ගී පද රචකයන් සහ ප්රකාශකයන්ට හිමි විය යුතු කර්තෘභාගය සහ නිසි ඇගයීම ලබාදීම අරමුණු කරගනිමින් මෙම පියවර ගනු ලබයි.
විවාහ මංගල උත්සව, පෞද්ගලික හා ආයතනික සාද, ඩීජේ සංදර්ශන, සජීවී ප්රසංග, රාත්රී භෝජන හා නර්තන උත්සව, ප්රවර්ධන වැඩසටහන් ඇතුළු සංගීතය භාවිත වන සියලු උත්සව සඳහා මෙම බලපත්රය ලබා ගැනීම අනිවාර්ය කෙරුණි.
ඊට අමතරව ශ්රී ලාංකික සංගීත නිර්මාණ සහ ඉන්දීය ප්රසාංගික හිමිකම් සංගමය නියෝජනය කරන හින්දි සහ දෙමළ සංගීත නිර්මාණ වන අතර ඉංග්රීසි හෝ වෙනත් විදේශීය භාෂාවලින් පමණක් කෙරෙන ඉදිරිපත් කිරීම් සඳහා මෙම බලපත්රය අවශ්ය නොවන බව ද අවධාරණය කරනු ලබයි.
මෙවැනි උත්සව පැවැත්වීමට දින 14කට පෙර බලපත්රය ලබාගත යුතුය. ඩීජේ සහ සජීවී සංගීත උත්සව සඳහා බලපත්ර ගාස්තු
සහභාගි වන පුද්ගලයන් සංඛ්යාව අනුව,
ඩීජේ සහ සජීවී සංගීත උත්සව සඳහා අදාළ වන බලපත්ර ගාස්තු පහත පරිදි වේ.
පුද්ගලයන් 100ට අඩු රු. 20,000
පුද්ගලයන් 100–300 රු. 30,000
පුද්ගලයන් 300ට වැඩි රු. 40,000
සජීවී සංගීත උත්සව;
පුද්ගලයන් 100ට අඩු රු. 25,000
පුද්ගලයන් 100–300 රු. 35,000
පුද්ගලයන් 300ට වැඩි රු. 50,000
පෞද්ගලික හෝ ආයතනික ඩීජේ උත්සව සඳහා සහභාගි වන පුද්ගලයන් සංඛ්යාව අනුව ගාස්තු පහත පරිදි වේ.
පුද්ගලයන් 100ට අඩු රු. 25,000 රු. 50,000
පුද්ගලයන් 100–300 රු. 40,000 රු. 75,000
පුද්ගලයන් 300ට වැඩි රු. 50,000 රු. 125,000
උත්සවවලට අමතර ව සුපිරි වෙළෙඳසැල්, බැංකු, ප්රදර්ශනාගාර, සාප්පු සංකීර්ණ, කාර්යාල ගොඩනැගිලි සහ සිනමා ශාලා සඳහා වර්ග ප්රමාණය හා පළාත් පාලන බලප්රදේශය මත පදනම් වූ වාර්ෂික බලපත්රයක් හඳුන්වා දී ඇත. මීට අමතර ව මගී බස් රථ හෝ දුරගමන් බස් රථ, සංචාරක වාහන සහ දුම්රිය සඳහා ද මෙම බලපත්ර ක්රමය අදාළ වන බව ද සඳහන් කරයි.
ශ්රී ලංකා හෝටල් සංගමයේ සභාපති අසෝක හෙට්ටිගොඩ මහතා පෙන්වා දෙන්නේ, මෙය හෝටල්වලට දැරිය නොහැකි මූල්ය බරක් වුවහොත් සිංහල සංගීතය වාදනය කිරීම සීමා කිරීමට සිදුවන බවයි. එය ශ්රී ලාංකේය සංස්කෘතිය අත්විඳීමට පැමිණෙන සංචාරකයන්ට මෙන්ම සංචාරක කර්මාන්තයට ද අහිතකර ලෙස බලපාන බව සඳහන් කරන ඒ මහතා, මේ සම්බන්ධයෙන් සංචාරක අමාත්යාංශයේ උපදෙස් පතන බව ද පැවසීය.
