වත්මන් විස්තීරණ ණය පහසුකම් වැඩසටහන අවසන් වීමෙන් පසු ජාත්යන්තර මූල්ය අරමුදල සමඟ තවත් වැඩසටහනක් සඳහා ඉල්ලුම් කරන්නේද යන්න තීරණය කළ යුත්තේ ශ්රී ලංකා රජය බව ජාත්යන්තර මූල්ය අරමුදලේ මෙහෙයුම් ප්රධානී එවන් පපර්ජියෝර්ජියෝ පවසයි.
ඔහු සඳහන් කළේ, වත්මන් IMF වැඩසටහන යටතේ තවත් සමාලෝචන දෙකක් අවසන් කිරීමට ඇති බවය.
ඒ අනුව, 7 වන සමාලෝචනය මේ වනවිට සාකච්ඡා කෙරෙමින් පවතින අතර, 8 වන සහ අවසන් සමාලෝචනය සිදුකිරීමට නියමිත බවද ඔහු සඳහන් කළේය.
වත්මන් සමාලෝචන යටතේ ඉලක්ක කිහිපයක් සහ ප්රතිසංස්කරණ වැඩසටහන් සකස් කර ඇති අතර, ඒවා සම්පූර්ණ කර ගැනීමට හැකිවනු ඇතැයි අපේක්ෂා කරන බවද IMF දූත මණ්ඩල ප්රධානියා පැවසීය.
රජය නව IMF වැඩසටහනක් ඉල්ලා තිබේද යන්න සම්බන්ධයෙන් කළ විමසීමකට පිළිතුරු දෙමින් ඔහු සඳහන් කළේ, එය රජය අත්කර ගැනීමට අපේක්ෂා කරන අරමුණු සහ නව වැඩසටහනක අවශ්යතාව පිළිබඳ රජයේ තීරණය මත රඳා පවතින බවය.
විධිමත් IMF වැඩසටහනක් නොමැති අවස්ථාවකදී වුවද රටවලට සහාය ලබාදීම සඳහා IMF සතුව විවිධ ක්රමවේද පවතින බවද ඔහු පෙන්වා දුන්නේය.
මේ අතර, වත්මන් 7 වන සමාලෝචනය සම්බන්ධයෙන් කාර්ය මණ්ඩල මට්ටමේ එකඟතාවකට පැමිණීමට පෙර එකඟ විය යුතු කරුණු කිහිපයක් පමණක් ඉතිරිව ඇති බවද එවන් පපර්ජියෝර්ජියෝ සඳහන් කළේය.
සැප්තැම්බර් 10 සිට 23 දක්වා ජාත්යන්තර මූල්ය අරමුදලේ කණ්ඩායමක් ශ්රී ලංකාවේ සිදුකළ සංචාරය අවසන් කිරීමෙන් අනතුරුව ඔහු මෙම අදහස් පළ කළේය.
සංචාරයේදී ශ්රී ලංකාවේ මෑතකාලීන ආර්ථික වර්ධනයන්, විස්තීරණ ණය පහසුකම් වැඩසටහන යටතේ ප්රගතිය සහ 2026 වාර්ෂික උපදේශනයට අදාළ ප්රතිපත්ති පිළිබඳව සාකච්ඡා කර තිබේ.
ජාත්යන්තර මූල්ය අරමුදල පවසන්නේ, අඛණ්ඩ ආර්ථික කම්පන මධ්යයේ වුවද ශ්රී ලංකා ආර්ථිකය ඔරොත්තු දීමේ හැකියාවක් පෙන්නුම් කර ඇති බවය.
