අධිකරණයට අපහාස කළැයි කියමින් කොළඹ කොටුව මහේස්ත්රාත් අධිකරණයෙන් අභියාචනාධිකරණයට කරුණු වාර්තා කිරීම දෝෂ සහිත බැවින් එය අත්හිටුවන නියෝගයක් ඉල්ලා සර්වජන බලය පක්ෂයේ පාර්ලිමේන්තු මන්ත්රී දිලිත් ජයවීර මහතා ගොනු කළ රිට් පෙත්සමක් විභාගයට නොගෙනම ඉවත දැමීමට අභියාචනාධිකරණය අද (30) නියෝග කළේය.
අභියාචනාධිකරණ විනිසුරුවරුන් වන එම් සී බී එස් මොරායස් සහ ආදිත්ය පටබැඳිගේ මහත්වරුන්ගේ එකගත්වයෙන් අභියාචනාධිකරණයේ සභාපති විනිසුරු රොහාන්ත අබේසූරිය මහතා මෙම නියෝගය ප්රකාශයට පත් කළේය.
පාස්කු ඉරිදා ත්රස්ත ප්රහාරය සම්බන්ධයෙන් අත්අඩංගුවට ගෙන රැඳවුම් බාරයේ සිටින රාජ්ය බුද්ධි සේවයේ හිටපු අධ්යක්ෂ සුරේෂ් සලේ මහතාට අදාලව කොටුව මහේස්ත්රාත් අධිකරණය ලබා දුන් නියෝගයක් සම්බන්ධයෙන් රූපවාහිනී සම්මූඛ සාකච්ඡාවකදී දිලිත් ජයවීර මහතා කරන ලද ප්රකාශයකින් බැලූ බැල්මට අධිකරණයට අපහාසයක් සිදුවී ඇතැයි කොළඹ කොටුව මහේස්ත්රාත් පසන් අමරසේන මහතා තීන්දු කර එය අභියාචනාධිකරණයට යොමු කිරීම සිදු විය.
කොළඹ කොටුව මහේස්ත්රාත්වරයාගේ එම නිගමනය දෝෂ සහිත බැවින් එය බල රහිත කිරීමේ රිට් ආඥාවක් නිකුත් කරන ලෙස දිලිත් ජයවීර මහතා මෙම පෙත්සමෙන් ඉල්ලා තිබිණි. පසුගිය 18 වැනිදා දීත් ජයවූරිය මහතා වෙනුවෙන් අධිකරණයේ කරුණු දැක්වූ ජනාධිපති නීතිඥ අලි සබ්රි මහතා කියා සිටියේ අපරාධ පරීක්ෂණ දෙපාර්තමේන්තුව අදාල සම්මූඛ සාකච්ඡාවෙන් තෝරාගත් ප්රකාශයක් පමණක් මහේස්ත්රාත්වරයාට ඉදිරිපත් කර ඇති බවයි. ජයවීර මහතා පාර්ලිමේන්තු මන්ත්රීවරයකු බවත්, අධිකරණයට අපහාස කිරීමට ඔහුට අවශ්යතාවක් තිබුණේ නම් පාර්ලිමේන්තුවේ දී ඔ්නෑම ප්රකාශයක් කිරීමට අවස්ථාව තිබුණු බවත්, අධිකරණයට අපහාස කිරීමේ චේතනාවක් ඔහුට නොතිබුණු බවත් අලි සබ්රි මහතා කීවේය.
දිලිත් ජයවීරගේ ප්රකාශය ඇතුළත් වීඩියෝපටය ද අධිකරණයේදී ප්රදර්ශනය කෙරෙිණි.
අලි සබ්රි මහතාගේ කරුණු දැක්වීමෙන් පසු නියෝජ්ය සොලිසිටර් නරාල් ජනක බණ්ඩාර මහතා කරුණු දක්වමින් ප්රකාශ කළේ මහේස්ත්රාත්වරයා කටයුතු කර ඇත්තේ 2024 අංක 8 දරණ අධිකරණයට, විනිශ්චය අධිකාරියකට හෝ ආයතනයකට අපහාස කිරීමේ පනත යටතේ බවයි. අධිකරණය හමුවේ ප්රදර්ශනය කළ වීඩියෝ පටයෙන් ද දිලිත් ජයවීර මහතා අධිකරණයට අපහාසායක් වෙන ආකාරයේ ප්රකාශ කර තිබෙන බව පැහැදිලි වන බවත්, මෙම රිට් පෙක්සම පවත්වාගෙන යාමේ හැකියාවක් නැති බවත්, ඒ අනුව මුල් අවස්ථාවේදීම රිට් පෙත්සම ප්රතික්ෂේප කරන ලෙස ඉල්ලා සිටින බවත් නියෝජ්ය සොලිසිටර් ජනරාල්වරයා සඳහන් කළේය.
ඒ අනුව අදාල රිට් පෙත්සම විභාගයට ගන්නවාද නැද්ද යන්න ගැන නියෝගය ලබාදීම අදට කල් තබා තිබිණි.
අදාල නියෝලය අද දින පකාශයට පත් කළ අභියාචනාධිකරණය දිලිත් ජයවීර මහතා ඉදිරිපත් කළ රිට් පෙත්සම විභාගයට ගැනීමෙන් තොරවම ප්රතික්ෂේප කිරීමට නියෝග කළේය. එසේම දිලිත් ජයවීර, විමල් වීරවංශ, උදය ගම්මන්පිල, මහින්ද පතිරණ සහ සූගීෂ්වර බණ්ඩාර ඇතුළු පිරිසට එරෙහිව ගොනු කරඇති අධිකරණ අපහාස නඩු කරුණු සලකා බැලීම සඳහා ඔක්තෝබර් 07 දින කැඳවීමට ද නියෝග කළේය.
