ශ්‍රී ලංකා මානව හිමිකම් කොමිෂන් සභාවේ නිලධාරීන් කණ්ඩායමක් රක්ෂිත බන්ධනාගාරගත කර සිටින අන්තර් විශ්වවිද්‍යාලයීය ශිෂ්‍ය බල මණ්ඩල කැඳවුම්කරු වසන්ත මුදලිගේ හමුවීම සඳහා වැලිකඩ රිමාන්ඩ් බන්ධනාගාරය වෙත ගොස් තිබේ.
එම කොමිෂන් සභාවේ කොමසාරිස් වෛද්‍ය නිමල් කරුණාසිරි, අධීක්ෂණ හා ඇගයුම් අධ්‍යක්ෂ නිහාල් චන්ද්‍රසිරි මහතා ඇතුළු කණ්ඩායමක් ඊයේ (11)දිනයේ බන්ධනාගාරය වෙත ගොස් ඇති බව එම කොමිෂන් සභාව සඳහන් කළේය.
වසන්ත මුදලිගේ රඳවා සිටි රැඳවුම් ස්ථානය වෙත ගිය අදාළ නිලධාරින් ඔහුගේ රැඳවුම් තත්ත්වය පරීක්ෂා කර එය වැඩිදියුණු කිරීම සඳහා ගත යුතු පියවර පිළිබඳව බන්ධනාගාර නිලධාරීන් දැනුවත් කර තිබේ.
ඊට අමතරව බන්ධනාගාර රැඳවියන් වෙත ලබාදෙන්නා වු ආහාර පිළිබඳ සහ එම ආහාර පාන පිළියෙල කළ ආකාරය සම්බන්ධයෙන් කොමිෂන් සභා නිලධාරින් කරුණු විමසීමක් සිදුකර ඇති අතර ආහාර සහ ඒවා පිළියෙල කරන ආකාරය වැඩි දියුණුකිරීම සඳහා ගත යුතු පියවරයන් පිළිබඳව ද අදාළ නිලධාරීන් දැනුවත් කිරීමට පියවර ගෙන ඇති බව වාර්තා වේ.
මේ සම්බන්ධයෙන් විමසීම සඳහා ඉදිරියේ දී බන්ධනාගාර නිලධාරීන් ශ්‍රී ලංකා මානව හිමිකම් කොමිෂන් සභාව වෙත කැඳවීමට ද නියමිත බව එම කොමිෂන් සභාවේ කොමසාරිස් වෛද්‍ය නිමල් කරුණාසිරි මහතා සඳහන් කළේය.
