යාපනය ශීක්ෂණ රෝහල් ඉතිහාසයේ සිදු කළ ප්‍රථම වකුගඩු බද්ධ කිරීමේ සැත්කම ඉතා සාර්ථක වූ බව යාපනය ශීක්ෂණ රෝහලේ අධ්‍යක්ෂක පී.සත්‍යමූර්ති අද ( 22 ) පැවසීය.
යාපනයේ පදිංචි 17 හැවිරිදි තරුණියකට ඇගේ මව විසින් ලබා දුන් වකුගඩුවක් ජනවාරී මස 18 වෙනිදා යාපනය ශීක්ෂණ රෝහලේදී බද්ධ කල අතර මේ වන විට එම තරුණිය යහපත් සෞඛ්‍ය තත්ත්වයෙන් පසුවන බව රෝහල් අධ්‍යක්ෂවරයා කීවේය.
වකුගඩු බද්ධ කිරීමේ සැත්කම රෝහල් අධ්‍යක්ෂවරයාගේ අධීක්ෂණය මත ශල්‍ය වෛද්‍ය තම්පිපිල්ලේ තවචෙන්ද ප්‍රමුඛ වෛද්‍ය කණ්ඩායම විසින් සිදු කරණ ලද අතර මෙම සැත්කම යාපනය ශීක්ෂණ රෝහල් ඉතිහාසයේ ප්‍රථමවරට සිදුකරන ලද වකුගඩු බද්ධ කිරීම වෙයි.
මේ අනුව ඉදිරි කාලයේදී උතුරේ වකුගඩු රෝගීන්ට යාපනය ශීක්ෂණ රෝහලේදී වකුගඩු සැත්කම් සිදු කර ගැනීමට අවස්ථාව සලසා දීමට යාපනය ශීක්ෂණ රෝහලේ පාලන අධිකාරිය පියවර ගෙන තිබේ.
