අද (14) රාත්‍රියේ යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් සිදුකළ වෙඩිතැබීමකින් පුද්ගලයෙකු මියගොස් තිබේ.
ඒ, අහුංගල්ල මිද්දරමුල්ල ප්‍රදේශයේදීය.
කුඩා දරුවන් දෙදෙනෙකු සමග යතුරුපැදියකින් ගමන් කරමින් සිටි පුද්ගලයෙකු ඉලක්ක කර මෙම වෙඩිතැබීම සිදුකර ඇත.
වෙඩි වැදීමෙන් බරපතළ තුවාල ලැබූ පුද්ගලයා ප්‍රතිකාර සඳහා බලපිටිය රෝහලට ඇතුළත් කිරීමෙන් පසු මියගොස් තිබේ.
වෙඩි වැදීමත් සමග යතුරුපැදිය පෙරළීගොස් ඇති අතර එහි ගමන් කළ කුඩා දරුවන් දෙදෙනා ඉන් සුළු තුවාල ලබා රෝහල්ගත කර ඇති බව පොලීසිය පවසයි.
පොලීසිය සඳහන් කළේ වෙඩිවැදී මියගොස් ඇත්තේ 29 හැවිරිදි මිද්දරමුල්ල ප්‍රදේශයේ පදිංචිකරුවෙක් බවය.
සැකකරුවන් පළාගොස් ඇති අතර ඝාතනය සම්බන්ධයෙන් අහුංගල්ල පොලීසිය වැඩිදුර විමර්ශන සිදුකරයි.
