ඉන්ෆ්ලුවෙන්සා රෝග ලක්ෂණ පෙන්නුම් කරන ළමුන් සංඛ්‍යාව යළි ඉහළ ගොස් ඇති බැවින් අවදානම් සහිත කණ්ඩායම් මුව ආවරණ පැළඳිය යුතු බව රිජ්වේ ආර්යා රෝහලේ ළමා රෝග පිළිබඳ විශේෂඥ වෛද්‍ය දීපාල් පෙරේරා සඳහන් කරයි.
ශ්වසන අපහසුතා, කැස්ස, සෙම්ප්‍රතිශ්‍යාව, උණ, නාසයෙන් සොටු දියර ගැලීම, නාසය අවහිර වීම සහ ඇතැම් අවස්ථාවල වමනය රෝග ලක්ෂණ ලෙස ඇතිවිය හැකි බව ද ඔහු ජනමාධ්‍ය වෙත පවසා ඇත.
ඉන්ෆ්ලුවෙන්සා වෛරසය A, B, C සහ D ලෙස වර්ග කර ඇති අතර A සහ B වර්ග මානව රෝග සම්බන්ධයෙන් වඩාත් වැදගත් වේ. ඉන්ෆ්ලුවෙන්සා C වෛරස් ප්‍රභේදය සුලභ වන අතර සාමාන්‍යයෙන් මෘදු ශ්වසන ආසාදන ඇතිකරයි.
ඉන්ෆ්ලුවෙන්සා D මෙතෙක් සතුන්ට (ප්‍රධාන වශයෙන් ගවයන්ට) පමණක් ආසාදනය වන බව හඳුනාගෙන ඇත.
කෙසේවෙතත්, ඉන්ෆ්ලුවෙන්සා A සහ B වර්ග දැන් ශ්‍රී ලංකාව තුළ ද දැකිය හැකිය. රෝගයේ මූලික අවස්ථාවේදී, ඉන්ෆ්ලුවෙන්සා ප්‍රතිජීවක ඖෂධ සමඟ ප්‍රතිකාර කිරීම අවශ්‍ය නොවේ. ද්විතියික වශයෙන් බැක්ටීරියා ආසාදන වැනි සංකූලතා ඇතිවුවහොත්, ප්‍රතිජීවක ඖෂධ නියම කළ හැකි නමුත් ඒ වෛද්‍යවරයෙකුගේ අධීක්ෂණය යටතේ පමණි.
ඉන්ෆ්ලුවෙන්සා, ඇතැම් කණ්ඩායම්වල, විශේෂයෙන් අවුරුදු දෙකහමාරකට අඩු ළමුන්, වයස අවුරුදු 55ට වැඩි පුද්ගලයන්, දුර්වල ප්‍රතිශක්තිකරණ පද්ධතියක් ඇති පිරිස්, නිධන්ගත ශ්වසන රෝග ඇති පුද්ගලයින්, ඇදුම, දියවැඩියාව, පිළිකා රෝගීන් සහ ගර්භණීනී කාන්තාවන් තුළ දරුණු විය හැක.
එබැවින්, ඉන්ෆ්ලුවෙන්සාව වේගයෙන් පැතිරීමට පෙර, විශේෂයෙන් පෙර පාසල් සහ පාසල් වයසේ දරුවන් වැනි ඇතැම් කණ්ඩායම් අතර රෝගය පැතිරෙන්නේදැයි ඉක්මණින් හඳුනාගැනීම වැදගත් බව වෛද්‍යවරු පෙන්වාදෙති.
