අනුරාධපුර රෝහලේ වෛද්‍යවරියක් ලිංගික අපයෝජනය කිරීමේ සම්බන්ධයෙන් අත් අඩංගුවට ගත් සැකකරු ලබන සඳුදා හඳුනා ගැනීමේ පෙරට්ටුවකට ඉදිරිපත් කරන ලෙසට අනුරාධපුර ප්‍රධාන මහේස්ත්‍රාත්වරයා නියෝග කර ඇත.
ඊයේ (14) දින අධිකරණයට ඉදිරිපත් කිරීමෙන් අනතුරුව සැකකරු 17 වනදා දක්වා රක්ෂිත බන්ධනාගාර ගත කිරීමටයි මහේස්ත්‍රාත්වරයා නියෝග කර ඇත්තේ.
මෙම අපරාධය සම්බන්ධයෙන් විමර්ශනවල ප්‍රගතිය දැක්වෙන වාර්තාවක්, මීළඟ නඩු දිනයේදී අධිකරණය හමුවට ඉදිරිපත් කරන ලෙසට ද ප්‍රධාන මහෙස්ත්‍රාත්වරයා අනුරාධපුර මූලස්ථාන ප්‍රධාන පොලිස් පරීක්ෂක ආර්.එම්. ජයවීරට තව දුරටත් නියෝග කර ඇත.
අනුරාධපුර ශික්ෂණ රෝහලේ වෛද්‍යවරිය ලිංගික අපයෝජනය කිරීමේ සිදුවීමට සැකපිට හිටපු යුද හමුදා සෙබළෙකු මෙන්ම පැවිදි වී සිටි පුද්ගලයෙක් පසුගියදා අත්අඩංගුවට ගැනුණු අතර ඔහුව අධිකරණ නියෝග මත රඳවා තබා ගෙන ප්‍රශ්න කරමින් සිටියේය.
කෙසේ නමුත් සැකකරු විසින් පැහැර ගෙන ගොස් ඇති වෛද්‍යවරියට අයත් ජංගම දුරකථනය සොයා ගැනීමට මෙතෙක් හැකිවී නැත.
