ග්‍රෑන්ඩ්පාස් – නාගලගම් වීදිය ප්‍රදේශයේ දී ඊයේ (17) රාත්‍රියේ සිදුවූ වෙඩි තැබීමෙන් තුවාල ලබා ඇත්තේ සංවිධානාත්මක අපරාධ කල්ලි සාමාජිකයෙකු වන මෝදර නිපුනගේ ගෝලයින් දෙදෙනෙකු බවට අනාවරණය වී ඇති බව වාර්තා වේ.
පොලිසිය සැක පළ කරන්නේ, මත්ද්‍රව්‍ය ජාවාරම සම්බන්ධයෙන් ඇති වූ ආරවුලක් මත මෙම වෙඩි තැබීම සිදුවන්නට ඇති බවයි.
එමෙන්ම තවත් සංවිධානාත්මක අපරාධ කල්ලි සාමාජිකයෙකු වන සේදවත්තේ කසුන්ගේ පාර්ශවය විසින් මෙම වෙඩි තැබීම සිදු කරන්නට ඇති බවටද පොලිස් විමර්ශනවලදී අනාවරණය වී ඇති අතර වෙඩි තැබීමට නිශ්චිත හේතුව මෙතෙක් අනාවරණ වී නොමැත.
තුවාල ලැබූ දෙදෙනා ප්‍රතිකාර සඳහා කොළඹ ජාතික රෝහලට ඇතුළත් කෙරුණු අතර ඔවුන් ග්‍රෑන්ඩ්පාස් ප්‍රදේශයේම පදිංචි අවුරුදු 23 සහ 28 යන වයස්වල පසුවන පුද්ගලයන් දෙදෙනෙකි.
කෙසේ නමුත් වසරේ මේ දක්වා වෙඩි තැබීමේ සිද්ධීන් 25ක් වාර්තා වී ඇති අතර ඉන් සිදුවීම් 16ක් සංවිධානාත්මක වෙඩි තැබීමේ සිදුවීම් බවයි පොලිසිය සදහන් කළේ.
එමෙන්ම එම සිද්ධීන්වලදී පුද්ගලයින් 20 දෙනෙකු ජිවිතක්ෂයට පත්ව ඇති අතර තුවාල ලබා ඇති සංඛ්‍යාව 11කි.
