පරාටේ නීතිය ක්‍රියාත්මක කිරීම අත්හිටුවීම සඳහා ලබා දී තිබූ සහන කාලය දීර්ඝ කර ඇති බව මුදල් අමාත්‍යාංශය නිවේදනයක් නිකුත් කරමින් සඳහන් කරයි.
ඒ අනුව, රුපියල් මිලියන 25 ට අඩු ණය ලබාගෙන ඇති ක්ෂුද්‍ර කුඩා හා මධ්‍ය පරිමාණ ව්‍යාපාර සඳහා 2025 දෙසැම්බර් 31 වන දා දක්වා සහන කාලය හිමි වන බව එම නිවේදනයේ සඳහන් කර ඇත.
එමෙන් ම, රුපියල් මිලියන 25 ත් 50ත් අතර ප්‍රමාණයක් ණය ලබාගෙන ඇති ව්‍යාපාර සඳහා 2025 සැප්තැම්බර් 30 දක්වා කාලය දීර්ඝ කර ඇති බවද සඳහන් වේ.
මුදල් අමාත්‍යාංශය සඳහන් කළේ, රුපියල් මිලියන 50 ඉක්මවන ණය ලබා ගෙන ඇති ක්ෂුද්‍ර කුඩා හා මධ්‍ය පරිමාණ ව්‍යාපාර සඳහා 2025 ජුනි 30 දක්වා කාලය දීර්ඝ කළ බවයි.
කෙසේ වෙතත්, මෙම සහන කාලය 2025 මාර්තු 31 වන දිනට පෙර බැංකු සමග සාකච්ඡා ආරම්භ කළ කුඩා හා මධ්‍ය පරිමාණ ව්‍යාපාර සඳහා පමණක් ලබා ගත හැකි බව මුදල් අමාත්‍යාංශය සඳහන් කර ඇත.
