බණ්ඩාරගම දිසා රෝහල භාරයේ තිබූ මළ සිරුරක් පැහැරගත් පිරිසෙන් කාන්තාවක් ඇතුළු පුද්ගලයන් සිව් දෙනකු අත්අඩංගුවට ගත් බව බණ්ඩාරගම පොලිසිය පවසයි.
පොලිසිය සඳහන් කළේ, අත්අඩංගුවට පත් වූවන් අතර මියගිය පුද්ගලයාගේ පුත්‍රයා සහ ඥාති දියණියකද වන බවයි.
බණ්ඩාරගම අලුත්ගම ගම්මාන පාරේ පදිංචිව සිටි 51 හැවිරිදි සිව් දරු පියා බණ්ඩාරගම – කැස්බෑව මාර්ගයේ වැල්මිල්ල ප්‍රදේශයේදී බණ්ඩාරගම දෙසට පැමිණීමෙන් සිටියදී ඊයේ (16) රාත්‍රියේ ප්‍රතිවිරුද්ධ දිශාවෙන් පැමිණි යතුරුපැදියක් සමග මුහුණට මුහුණ ගැටී යතුරුපැදිකරුවන් දෙදෙනාම තුවාල ලබා ඇති අතර, මියගිය පුද්ගලයා බරපතල තුවාල ලබා සිටියදි බණ්ඩාරගම දිසා රෝහල වෙත රැගෙන ගොස් තිබුණි.
මේ අතර ඒ වන විටත් ඔහු මියගොස් සිටි බව පොලිසිය පවසයි.
අනතුරුව මඳ වේලාවක් ගතවනවිට එම පුද්ගලයාගේ ඥාතීන් සහ හිතවතුන් 15කට අධික පිරිසක් යතුරු පැදි සහ තීරෝද රථ මගින් රෝහල් භූමියට පැමිණ ඇත.
ඉන්පසු, එකවරම රෝහලේ හදිසි ප්‍රතිකාර ඒකකය වෙත කඩා වැදී වෛද්‍යවරුන්ට පරුෂ වචන කියමින්, තර්ජනය කර මියගිය පුද්ගලයාගෙ මලසිරුර රැගෙන පලා ගොස් ඇත.
