අති උතුම් ශුද්ධෝත්තම ෆ්‍රැන්සිස් පාප් වහන්සේ ස්වර්ගස්ථ වීමත් සමග පුරප්පාඩු වන පාප් ධුරය සඳහා මීළඟ සුදුස්සා තෝරා පත්කර ගැනීම අවම වශයෙන් දින 15 කට පසුව සිදුවනු ඇතැයි විදෙස් මාධ්‍ය වාර්තා කරයි.
විදෙස් මාධ්‍ය සඳහන් කළේ, නව පාප් වහන්සේ කෙනෙක් තෝරා පත්කර ගන්නා තෙක් කතෝලික පල්ලියේ වැඩබලන ප්‍රධානියා ලෙස පාප් තුමාගේ මූල්‍ය ලේකම් සහ භාණ්ඩාගාරික කාදිනල් කෙවින් ෆැරල් පියතුමන් කටයුතු කරනු ඇති බවත්, ඔහුට සීමාසහිත බලතල ප්‍රමාණයක් හිමිවනු ඇති බවත් ය.
නව පාප් වහන්සේ තෝරා පත්කර ගැනීමේදී ඡන්දය ප්‍රකාශ කළ හැක්කේ වයස අවුරුදු 80 ට අඩු කාදිනල්වරුන්ට පමණක් බවද විදෙස් මාධ්‍ය පවසයි.
ඒ අනුව, දැනට ජීවත්ව සිටින කාදිනල්වරුන් 252න් 138 කට නව පාප් වහන්සේ තෝරා ගැනීම සඳහා ඡන්දය ප්‍රකාශ කිරීමට අවස්ථාව ලැබෙනු ඇතැයි විදෙස් මාධ්‍ය වාර්තා කරයි.
ඡන්ද විමසීම සිස්ටයින් දේවස්ථානය තුළදී සිදුවනු ඇති බවත් බොහෝදුරට කාදිනල්වරයෙක් නව පාප් වහන්සේ ලෙස තේරී පත්වීමට ඉඩ තිබෙන බවත්, විදෙස් මාධ්‍ය සඳහන් කරයි.
කෙසෙ නමුත් නව පාප් වහන්සේ කෙනෙක් සඳහා තුනෙන් දෙකක බහුතර ඡන්දයක් ලැබෙන තෙක් කාදිනල්වරුන්ට සිස්ටයින් දේවස්ථානයෙන් පිටව යාම හෝ තාක්ෂණය වෙත ප්‍රවේශ වීම තහනම් වේ.
