සබරගමුව විශ්ව විද්‍යාලයේ දෙවන වසරේ තාක්ෂණ පීඨයේ සිසුවෙකුගෙ හදිසි මරණය සහ අදාල පීඨයේ සිසුන් හට නවක වදය ලබා දීම සම්බන්ධයෙන් වූ විමර්ශන අපරාධ පරීක්ෂණ දෙපාර්තමේන්තුව වෙත භාර දී ඇති බව වාර්තා වේ.
මේ සම්බන්ධව පසුගිය 29 වැනි දින සමනලවැව පොලිස් ස්ථානය වෙත ලද පැමිණිල්ලකට අනුව ඊයේ (02) දින සමනලවැව පොලිස් ස්ථානය විසින් නවක වදයට ලක්වූ එම විශ්වවිද්‍යාලයේ සිසුන් 20කගෙන් ප්‍රකාශයක් ලබා ගැනීමට කටයුතු කර තිබුණි.
ඒ අනුව අද (03) දින වැඩබලන පොලිස්පතිවරයාගේ නියෝග පරිදි ඉහත පැමිණිල්ලට අදාළ ඉදිරි විමර්ශන කටයුතු සිදු කිරීම සඳහා මේ සම්බන්ධව ඉදිරි විමර්ශන කටයුතු සිදු කිරීමට අපරාධ පරීක්ෂණ දෙපාර්තමේන්තුව වෙත භාර දුන් බව පොලීසිය නිවේදනයක් නිකුත් කරමින් සඳහන් කරයි.
මේ අතර කොස්ගොඩ පොලිස් ස්ථානය මගින් අත්අඩංගුවට ගත් සැකකරුවෙකු මියයාම සම්බන්ධව විමර්ශන කටයුතුද අපරාධ පරීක්ෂණ දෙපාර්තමේන්තුව වෙත භාරදී ඇත..
අද (03) වැඩබලන පොලිස්පතිවරයාගේ නියෝග පරිදි එම සිද්ධියට අදාළ ඉදිරි විමර්ශන කටයුතු සිදු කිරීම සඳහා අපරාධ පරීක්ෂණ දෙපාර්තමේන්තුව වෙත භාරදී ඇති බවයි වාර්තා වන්නේ.
පසුගිය 01 වනදා අයිස් මත්ද්‍රව්‍ය ග්‍රෑම් 06 මිලිග්‍රෑම් 210 ක් සන්තකයේ තබාගැනීම සම්බන්ධයෙන් කොස්ගොඩ පොලිසිය මඟින් අත්අඩංගුවට ගෙන සිටි කොස්ගොඩ ප්‍රදේශයේ පදිංචි වයස අවුරුදු 28 ක් වූ සැකකරුවෙකු 2025.05.02 වන දින පොලිස් භාරයේ සිටියදී මිය යන ලදී.
