රුසියාව ඊයේ යුක්රේනයේ ප්‍රධාන කාර්මික නගරයක් වන ඩිනිප්‍රෝ වෙත බැලස්ටික් මිසයිල ප්‍රහාරයක් එල්ල කර ඇති අතර එම ප්‍රහාරයෙන් පුද්ගලයින් 17 දෙනෙකු මිය ගොස් 270 කට වැඩි පිරිසක් තුවාල ලබා ඇති බව වාර්තා වේ.
ඒත් සමග ඩිනිප්‍රෝ නගරාධිපති බොරිස් ෆිලටොව් ශෝක දිනයක් ප්‍රකාශයට පත් කරමින් නිවේදනයක් නිකුත් කරමින් කියාසිටියේ “මෙය පූර්ණ පරිමාණ යුද්ධයේ මුළු කාලය තුළම නගරය නොදුටු විරූ විනාශයක්” බවයි.
මැයි මාසයේ සිට රුසියාව යුක්රේනයට එල්ල කරන ප්‍රහාරවල වාර ගණන වැඩි කර ඇති අතර රුසියාවේ ඩ්‍රෝන නිෂ්පාදනය ද වේගවත් කර ඇති බව වාර්තා වේ.
ජුනි මාසයේදී පමණක් මොස්කව් වලින් යුක්රේනයට ඩ්‍රෝන යානා 2,736 ක් දියත් කළ බව එරට ජනාධිපති වොලොඩිමියර් සෙලෙන්ස්කි ඊයේ නෙදර්ලන්ත පාර්ලිමේන්තුව අමතමින් පවසා ඇති අතර ඊට අමතරව ක්‍රෙම්ලිනය යුක්රේනයට මිසයිල දුසිම් ගණන් දියත් කරමින් සිටියි.
