කහතුඩුව ප්‍රදේශයේ සිට සුදු පැහැති වෑන් රථයකින් පැහැරගෙන ගිය බව කියන 15 හැවිරිදි පාසල් සිසුවෙකු, රත්නපුර ප්‍රදේශයේදී එම වෑන් රථයෙන් පැන සිය දිවි රැක ගැනීමට සමත්වී ඇත.
සිසුවා පැහැරගැනීමේ සිදුවීම සම්බන්ධව වෑන් රථය සහ එමඟින් ගමන් කළ පුද්ගලයින් සොයා කහතුඩුව පොලීසිය විශේෂ විමර්ශනයක් ආරම්භ කර ඇත.
සිද්ධිය සිදු වූයේ ඊයේ (ජූලි 16) සවස 4.00ට පමණය.
මෙම සිසුවා පිළියන්දල ජාතික පාසලක 11 ශ්‍රේණියේ ඉගෙනුම ලබන අතර, කහතුඩුව ප්‍රදේශයේ පදිංචිකරුවෙකු බවද අනාවරණය වේ.
ඔහු අමතර පන්තියකට සහභාගි වීමට පාපැදියෙන් යමින් සිටියදී, කහතුඩුව සරණ තිස්ස මාවතේ සුසාන භූමිය අසළදී සුදු පැහැති කුඩා වෑන් රථයකින් පැමිණි පිරිසක් විසින් ඔහු පාපැදිය සහිතව පැහැරගෙන ගොස් ඇති බවයි පොලිසිය පවසයි.
