කාන්තාවන්ගේ අත්බෑග් සහ ජංගම දුරකථන කොල්ලකෑමක් සම්බන්ධයෙන් තරුණයන් දෙදෙනෙකු පිළියන්දල පොලීසිය මගින් අත්අඩංගුවට ගෙන ඇත.
අත්අඩංගුවට ගත් දෙදෙනාගෙන් එක් අයෙකු මීට මාස 2කට පමණ ඉහතදී ඔස්ට්‍රේලියාවේ සිට නිවාඩුවට මෙරටට පැමිණි අයෙකු වන අතර, අනෙක් තරුණයා පානදුර ප්‍රදේශයේ කෝටිපති ව්‍යාපාරිකයකුගේ පුත්‍රයෙකු බව සඳහන් වේ.
ඔවුන් දෙදෙනා කොල්ලකන ලද ජංගම දුරකථතන අතර, නවීන පන්නයේ ජංගම දුරකථන 5ක්, ස්මාර්ට් ජංගම දුරකථන 15කට ආසන්න ප්‍රමාණයක් තිබී සොයාගෙන ඇති අතර පොලීසිය සඳහන් කළේ මෙම උපකරණවල වටිනකම රුපියල් ලක්ෂ 25කට ආසන්න බවයි.
තවද කොල්ලකෑම සඳහා යොදාගත් ව්‍යාජ අංක තහඩු සවිකල යතුරුපැදියක්, මුහුණ සම්පූර්ණයෙන්ම ආවරණය සේ පළඳින ආරක්ෂක හිස් වැසුම් දෙකක්, හොරයින් මත්කුඩු මිලිගෑම් 10,900ක්, කාන්තා අත්බෑගයක් සහ කරමත එල්ලාගෙන යන බෑක් දෙකක්ද පොලීසිය සිය භාරයට ගෙන ඇත.
මෙම සැකකරුවන් දැඩි ලෙස මත්ද්‍රව්‍ය පානයට ඇබ්බැහි වූවන් වන අතර, ඔවුන් දිනකට මත්කුඩු පැකට් 20ක් පානය කරන බවට ප්‍රශ්න කිරීමේදී අනාවරණය වී තිබේ.
විවිධ අපරාධ සිදුකර පලායන පුද්ගලයන් ඉලක්ක කර මුහුණු ආවරණය වනසේ හිස්වැසුම් පැළඳ යතුරුපැදිවලින් ගමන්ගන්නා පුද්ගලයන් පරික්ෂා කිරීමේ විශේෂ මෙහෙයුමක දී මෙම දෙදෙනා අත්අඩංගුවට පත්ව ඇත.
ඔවුන් දෙදෙනා පිළියන්දල දෙස සිට කොළඹ දෙසට පෙරේදා (23) සවස ගමන්කරමින් සිටියදී, බෝකුන්දර ප්‍රදේශයේදී පොලීසිය විසින් නැවතීමට සංඥා කර ඇති නමුත් එහිදී ඔවුන් නොනවත්වා ධාවනය කර ඇති අතර, ඒ හේතුවෙන් පොලීසිය පසුපස හඹා ගොස් මඟ හරස් කර නවතා පරික්ෂාකර තිබේ.
එහිදී යතුරුපැදියේ ඉදිරිපස සහ පසුපස එකිනෙක වෙනස් අංක තහඩු දෙකක් සවිකර තිබූ අයුරු නිරීක්ෂණය වී ඇත.
එමෙන්ම ඔවුන් සන්තකයේ හොරෙයින් මත්කුඩු හමුවීමෙන් අනතුරුව, පොලීසියට රැගෙන දීර්ඝ ප්‍රශ්නකිරීමේදී හෙළවී ඇත්තේ ඔවුන් දෙදෙනා ඉකුත් මාස දෙකක පමණ කාලයක සිට මෙම සොරකම්වල නිතර වී සිටි බවයි.
බොරලැස්ගමුව, මිරිහාන, බොරැල්ල, අතුරුගිරිය, තලංගම හා පිළියන්දල පොලිස් වසම් වල රැකියා නිමවා නිවෙස් කරා රාත්‍රියේ යන කාන්තාවන්ගේ අත්බෑග සහ ජංගම දුරකථන කොල්ලකෑමේ යේදී ඇති බවට ප්‍රශ්න කිරීම්වලදී වැඩිදුරටත් අනාවරණය වී ඇත.
ඔවුන් කොල්ලකලද අත්බෑග වල තිබෙන මුදල් සහ ජංගම දුරකථනන ලබාගෙන, එම බෑග් බොල්ගොඩ ගඟට සහ විවිධ කැලෑබද ප්‍රදේශවලට විසිකළ පවසා තිබේ.
කොල්ලකන ලද වටිනා ජංගම දුරකථන දෙකක් ඇතුළු දුරකථන දහයකට අධික ප්‍රමාණයක් මොරටුව ප්‍රදේශයේ දුරකථන අලෙවි සැලකට අමතර කොටස් සඳහා විකුණූ බවත්, අනෙක් ජංගම දුරකථනවලින් වටිනා කොටස් පමණක් ගලවා එම ස්ථානයට විකුණා මුදල් කර මත්ද්‍රව්‍ය පානය සඳහා වැයකළ බවත් පොලීසියේ දී අනාවරණය වී ඇත.
එලෙස කොල්ලකෑ ජංගම දුරකථනවල වටිනා කොටස් ගැලවූ දුරකථන කිහිපයක් කෝටිපති ව්‍යාපාරිකයාගේ පුත්‍රයා සිය සුඛෝභෝගී නිවසේ කාමරය තුළ තිබීයදිත්, මොරටුව ප්‍රදේශයේ දුරකථන අලෙවිහලට අලෙවිකර තිබියදීත් පොලිසිය මගින් සොයාගෙන තිබේ.
මෙම සැකකරුවන් වයස අවුරුදු 25 හා 26 වයස්වල පසුවන්නන් වන අතර, ඔවුන් කැස්බෑව මහෙස්ත්‍රාත් අධිකරණය වෙත ඉදිරිපත් කිරීමට නියමිතව ඇත.
පිළියන්දල පොලිසිය පරීක්ෂණ පවත්වයි.
