ප්‍රකට රගර් ක්‍රීඩක වසීම් තාජුඩීන්ගේ මරණය රිය අනතුරකින් හෝ විෂ දුමක් ආග්‍රහණයකින් සිදුවූවක් නොව ඔහුව දස වද දී ඝාතනය කර ඇති බව අධිකරණ වෛද්‍ය මණ්ඩලයකින් සහතික කර තිබෙන බව වසීම් තාජුඩීන්ගේ මාමා වන ෆයාස් ලතීෆ් පවසයි.
එසේ තිබිය දී වසර 13ක් තිස්සේ කිසිම අපරාධකරුවෙකුට දඬුවමක් නොලැබුන බවයි ෆයාස් ලතීෆ් පවසන්නේ.
ඒ ඊයේ(28) පැවති අපරාධ රාජ්‍යක් අසංශිප්ත පරිච්ඡේදයක් කෘතිය එළිදැක්විමේ අවස්ථාව සඳහා එක්වෙමින් ඔහු මෙම අදහස් පලකර සිටියා.
එහිදී ඔහු සදහන් කලේ,
“එයා මගේ ලොකු අක්කගේ පුතා. 2012 මැයි මාසේ 17 වැනිදා ඉවර වෙලා පාන්දර වගේ කොළඹ ඉන්න මගේ සහෝදරයා දුරකතනයෙන් කතා කළා. එතකොට මම නිදි. මම ආන්සර් කළා. කිව්වා මල්ලියේ… වසීම්ගේ වාහනය ඇක්සිඩන්ට වෙලා. ඔයා එන්න කොළඹට කියලා. මගදි එනකොට අයියා කිව්වා වසීම් නැතිවෙලා කියලා. මම එහෙම්ම ඇවිල්ලා කෙළින්ම ගියෙ අනතුර සිද්ධ වෙච්චි ස්ථානයට. ඒ ඇක්සිඩන්ට් එක දැක්කම පුදුමයි එවැනි රිය අනතුරකින් මෙවැනි ජීවිතයක් නැති වෙනෙවද කියලා. පොඩි ඩැමේජ් එකක් තමයි කාර් එකේ තිබුණේ. මට ඒක ප්‍රහේළිකාවක්. වාහනය ඇතුළෙ තමයි පුතාගේ මරණය තිබුණේ. මරණය තිබුණෙ රියදුරු අසුනේ නොවෙයි… අනික් පැත්තේ. මමත් මගේ යාලුවො දෙන්නෙකුත් තමයි වාහනේ දොර කඩලා මරණය අරන් මෘත ශරිරාගාරයට යැව්වේ.
මරණ වාර්තාවේ තිබුණෙ බීමත්කමින් අධික වේගයෙන් රිය පදවල ගිහිල්ලා ඒක ගිනි අරන් එකේ තියන විෂ දුම ආග්‍රහණය කරලා පුතා නැති වෙලා කියලා. අධික වේගයෙන් ගියා නම් ඒ කාර් එකේ ඇකිස්ඩන්ට් එක මීට වඩා වෙනස් වෙන්න ඕන. යහපාලනය එනකොට වසීම් තාජුඩීන් ඝාතනය ප්‍රසිද්ධ වේදිකාවල ප්‍රසිද්ධම ට්‍රොෆික් එකක් වුනා. අපේ මිනිස්සු යහපාලන ආණ්ඩුවට සියයට අනුවක් ඡන්දය දීලා පත් කරගත්තා. යහපාලන ආණ්ඩුවෙන් යම් දුරකට වැඩ සිද්ධ වුනා. මරණය ගොඩ අරන් නැවත පරීක්ෂණයක් කරන්න පවුලෙන් අවසර ඉල්ලුවා. අපි අවසර දුන්නා. උසාවියෙන් නියෝග කළේ අධිකරණ වෛද්‍ය කණ්ඩායමක් මේ මරණ පරීක්ෂණය කරන්න.
ඒ අය අධිකරණ වෛද්‍ය නිලධාරීන්ගේ වාර්තාව දුන්නා. එකේ තිබුණා බීමත්කමින්වත් විස දුම ආග්‍රහණය කළ නිසාවත් සිදුවන මරණයක නෙමෙයි, දස වද දීලා දරුවව මරලා කියලා. ඇයි මේක කරන්නේ. ඒ දරුවා රගර් ක්‍රීඩකයෙක්. අදටත් අපට උහුලා ගන්න බෑ. දරා ගන්න බෑ. ඒ මව ඉන්නේ තවමත් මානසික පීඩනයකින්.කිසිම ආණ්ඩුවකින් මේකට විසඳුමක් ලැබුණෙ නෑ. අපට අධිකරණය ගැන පූර්ණ විශ්වාසයක් තියනවා. වත්මන් රජයවත් පමා වෙලා හෝ අවුරුදු 13කට පස්සෙ හරි මේ නඩුව අරගෙන මේක කරපු වැරදි කරුවන්ට දඬුවම් ලබා දිය යුතුයි කියන විශ්වාසයේ අපි ඉන්නවා…”
2012 වසරේ මැයි මස 17 වනදා කිරුළපන ප්‍රදේශයේ අතුරු මාර්ගයකදි ගිනිගත් මෝටර් රථයක් තුළ තිබි වසිම් තාජුඩින් නම් රගර් ක්‍රිඩකයාගේ මළසිරුර සොයාගන්නා ලදි.
