දිස්ත්රික්ක 4ක ප්රාදේශීය ලේකම් කොට්ඨාස 33කට මේ වනවිට නිකුත් කර තිබූ නායයෑම් ඉවත්වීමේ රතු නිවේදන තවදුරටත් දීර්ඝ කළ බව ජාතික ගොඩනැඟිලි පර්යේෂණ සංවිධානය පවසයි.
පසුගිය දින කිහිපය තුළ බදුල්ල සහ මහනුවර යන දිස්ත්රික්කවල ඇතැම් ස්ථානවලට මි.මී 75 ඉක්මවු වර්ෂාවක් ලැබීම හේතුවෙන් මෙම නායයෑම් රතු නිවේදන තවදුරටත් බලපැවැත්වෙන බව ජාතික ගොඩනැඟිලි පර්යේෂණ සංවිධානයේ, ජ්යෙෂ්ඨ භූ විද්යාඥ ආචාර්ය වසන්ත සේනාධීර කියා සිටියේය.
ඊයේ (11) දිනය තුළ මීගහකිවුල, දෙමෝදර යන ප්රදේශවල නායයෑම් සිදුවීම් වාර්තා වන බැවින් ඒ පිළිබඳව ජනතාව නිරන්තරයෙන් අවධානයෙන් සිටිය යුතු බවද ඔහු අවධාරණය කරයි.
යම් ආකාරයක අනතුරුදායක තත්ත්වයක් අදාළ භූමියන්ගේ පවතින බැවින් කාලගුණ අනාවැකි සැලකිල්ලට ගෙන අදියර 2 යටතේ අවදානයෙන් සිටින ලෙස දන්වා නිකුත් කළ නායයෑමේ අනතුරු ඇඟවීමද දිස්ත්රික්ක 5ක ප්රාදේශීය ලේකම් කොට්ඨාස 38කට එලෙසින්ම ක්රියාත්මක වේ.
මීට අමතරව අදියර 1 යටතේ විමසිලිමත් වෙන ලෙස දන්වා නිකුත් කළ නායයෑම් නිවේදනය දිස්ත්රික්ක තුනක ප්රාදේශීය ලේකම් කොට්ඨාස 17කට තවදුරටත් ක්රියාත්මක වන බව ද ආචාර්ය වසන්ත සේනාධීර කියා සිටියේය.
ලැබෙන වර්ෂාපතනය සමඟ මෙම නිවේදන වෙනස් විය හැකි බැවින් අදාළ ප්රදේශවල සිටින ජනතාව ඒ පිළිබඳ නිරන්තරයෙන් අවධානයෙන් සිටිය යුතු බව ද ඔහු පවසයි.
ජීවිත රැසක් මේ වනවිට අහිමි වී ඇති පසුබිමක ආපදා කළමනාකරණ මධ්යස්ථානය, වාරිමාර්ග දෙපාර්තමේන්තුව, ගොඩනැඟිලි පර්යේෂණ සංවිධානය හෝ කාලගුණවිද්යා දෙපාර්තමේන්තුව විසින් නිකුත් කරනු ලබන නිවේදන ගැන නිරන්තරයෙන්ම ජනතාව අවධානය යොමු කළ යුතු බව ද පැවසු ආචාර්ය වසන්ත සේනාධීර නැවත එවැනි අවාසනාවන්ත තත්ත්වයක් ඇති නොවීමට ලබාදෙන ලබන උපදෙස් නිසිලෙස පිළිපඳින ලෙසද ජනතාවගෙන් ඉල්ලා සිටියි.
පසුගිය නොවැම්බර් මස 20 වන දින සිට අද (12) දක්වා වූ කාලය තුළ අනතුරුදායක ඉල්ලීම් පරීක්ෂා කිරීමට ජාතික ගොඩනැඟිලි පර්යේෂණ සංවිධානය වෙත ඉල්ලීම් 2,716ක් ලැබී ඇති අතර, එයින් 589ක් මේ වනවිට නිමකර වසන්ත සේනාධීර පැවසීය.
රට තුළ පවතින ආපදා තත්ත්වය තුළ මේ දිනවල සිදුකළ යුතු සුදුසුම දේ වන්නේ අනවශ්ය ගමන් බිමන්වලින් වැළකී ආරක්ෂිත ස්ථානයක ජීවත්වීම බවද අවධාරණය කර සිටි වසන්ත සේනාධීර මහතා සති අන්තයේ විනෝද චාරිකා යන්න යෑමට ඇති හැකියාව පිළිබඳව විමසා ජනතාවගෙන් ජාතික ගොඩනැඟිලි පර්යේෂණ සංවිධානයට දුරකථන ඇමතුම් කිහිපයක් ලැබුණු බවද මෙහිදී කියා සිටියේය.
තවමත් රට තුළ අවදානම් තත්ත්වයක් පවතින බැවින් “මේ වෙලාව විනෝද චාරිකා යෑමට අවස්ථාවක් නෙමෙයි…අපි ඉන්නේ අනතුරුදායක තත්ත්වයක” යනුවෙන් ඔහු වැඩිදුරටත් පැවසීය.
