ඕස්ට්රියාව විසින් පාසල්වල වයස අවුරුදු 14 ට අඩු දැරියන් හිස් වැසුම්(බුර්කා) පැළඳීම තහනම් කරන නීතියක් සම්මත කර ඇති බව වාර්තා වේ.
මෙම නීතිය රාජ්ය සහ පෞද්ගලික පාසල් යන දෙකටම අදාළ බවයි විදෙස් මාධ්ය වාර්තා කරන්නේ.
ඒ අනුව මෙම නව නීතිය මගින් වයස අවුරුදු 14 ට අඩු ගැහැණු ළමයින්ට හිජාබ් හෝ බුර්කා වැනි සාම්ප්රදායික මුස්ලිම් හිස් වැසුම් පැළඳීම තහනම් වේ.
මෙම තහනම උල්ලංඝනය කරන සිසුවියන් පාසල් බලධාරීන් සහ ඔවුන්ගේ නීතිමය භාරකරුවන් සමඟ සාකච්ඡා කිහිපයකට මුහුණ දිය යුතු අතර, නැවත නැවත උල්ලංඝනය කිරීම් සිදුවුවහොත් ළමා හා යොවුන් සුබසාධන ඒජන්සිය දැනුවත් කළ යුතු බව සදහන් වේ.
අවසාන විසඳුම ලෙස, පවුල්වලට හෝ භාරකරුවන්ට යුරෝ 800 ක් (£700) දක්වා දඩ නියම කළ හැකියි.
මෙම නීතිය ස්ත්රී පුරුෂ සමානාත්මතාවය සඳහා වූ පැහැදිලි කැපවීමක් ලෙස බලධාරීන් හඳුන්වන අතර එම තහනම දරුවන් 12,000 ක් පමණ වෙත බලපානු ඇතැයි ලිබරල් නියෝස් පක්ෂයේ පාර්ලිමේන්තු නායක යානික් ෂෙට්ටි පවසයි.
කෙසේ නමුත් එරට විපක්ෂයේ ග්රීන් පක්ෂය මෙම නව නීතිය පැහැදිලිවම ව්යවස්ථා විරෝධී බව ප්රකාශ කර තිබේ.
ඕස්ට්රියාවේ නිල ඉස්ලාමීය ප්රජාව (IGGÖ) සඳහන් කළේ මෙම තහනම මූලික අයිතිවාසිකම් උල්ලංඝනය කරන බවත්, එය සමාජය බෙදීමට හේතු වන බවයි.
2020 දී, වයස අවුරුදු 10 ට අඩු දැරියන් සඳහා වූ සමාන හිස් වැසුම් තහනමක් මුස්ලිම්වරුන් විශේෂයෙන් ඉලක්ක කළ නිසා ව්යවස්ථාපිත අධිකරණය විසින් අහෝසි කරන ලද බව IGGÖ සිහිපත් කරයි..
කෙසේ වෙතත්, රජය පවසන්නේ මෙවර එම ගැටලුව මඟහැරීමට උත්සාහ කර ඇති බවයි.
මෙම නව නීතිය ව්යවස්ථාපිත අධිකරණයෙන් සම්මත වේද යන්න පිළිබඳව තමාට විශ්වාස නැති බව නීතියට පක්ෂව ඡන්දය දුන් නියෝස් පක්ෂය පවසා ඇත
දැනුවත් කිරීමේ පර්යේෂණ කාලයක් 2026 පෙබරවාරි මාසයේදී ආරම්භ වන අතර, සම්පූර්ණ තහනම ලබන සැප්තැම්බර් මාසයේදී (නව පාසල් වාරය ආරම්භයේදී) බලාත්මක වීමට නියමිතයි.
තහනමට පක්ෂව ඡන්දය දුන් විපක්ෂයේ අති දක්ෂිණාංශික ෆ්රීඩම් පක්ෂය (FPÖ) කියා සිටියේ මෙම නීතිය ප්රමාණවත් නොවන බවයි.
පාසල්වල හිස් වැසුම් පිළිබඳ පොදු තහනමක් තිබිය යුතු බවත්, එය සියලුම සිසුන් සහ පාසල් කාර්ය මණ්ඩලය ඇතුළත් වන පරිදි පුළුල් කළ යුතු බවත් FPÖ පෙන්වා දෙයි.
